Lada ka Assam ka dang tam pud, dei ban pynphai da u kuli, ong U MLA

Shillong:”Nga sngew nguh ïa ka Sorkar jylla ba ka la treh ban kohnguh ban buh ïa ki 7 tylli ki Border Out post (BOP) ba kynthup ruh ïa ka Mukroh ha kaba 5 ngut ki mynsiem briew ki la duhei na ka jing shah siat pathar ha ki pulit ka Assam bad kitei ki BOP kidei ban buh ha baroh ki jaka khap pud bad ka Assam,” ong u MLA ka 17 North Shillong Konstitwensi u Bah Adelbert Nongrum.

U la ong ba kane ruh ka la wan urlong namar kadei ka kam kaba hakhmat duh. “Kane ba nga ju ong barabor ba lada ka Sorkar ka mon ka lah beit bad kine ki jingjia kidei namar ka jingpulom ka Sorkar ba la leit bad kane kaba mynta kaba ngi hap shim lang ka jingkitkhlieh,” ong u MLA.

U la ong ba ka Sorkar kadei ban pynthikna ba ka jingdon kitei ki BOP kidei ban long kiba khlaiñ ha ka jingpynbiang ki pulit, ki tiar ïaleh bad ban ruh ka hukum ban bud ka nuksa ïa ka Mizoram ban ym ailad ne kata ka Zero Tolerance Policy bad lada ka Sorkar Assam ka dangbteng ban thombor ne tam pud kadei ban pynthikna badei ban pynphai da u kuli,” ong u Bah Adelbert Nongrum.

U la ong ba ka jingmut ban buh ïa ki Outpost ne BOP kadei ban ai ka jingïada ïa ki nongshong shnong, ka duh noh ki jaka bad ki jingkyntur pud beaiñ.
“Ki paidbah ka jylla kidei ban sakhi ban ïohi bad ban pynthikna ba ki pulit thrang snam kiba donkti ban shim ïa ka jingim balui lui dei ne ba donkam ban aiti sha ka Ïingkashari Meghalaya ban ïoh ka jingbishar kaba hok khamtam ba ki pulit ki la dep ujor Ejahar,” ong u Bah Adelbert Nongrum.

U la ong ruh ba ka daw ka jingshim kabu jong ka Assam ha ki khappud kadei namar ki Sorkar ba la leit bad ka ba mynta kym shim nud kum ba nud ka Sorkar Mizoram ban ïeng Rangbah ban ïada ïa la ki jong ki briew bad ban ïada ruh na ka jingtam pud ïa la ka khyndew.

“Ngi la nang ïohi ba u CEM jong ka KAAC u la pynpaw ïa ka jingthmu ban tei Mot kumta ka Sorkar kam dei ban jem halor kane, ngim donkam ba kiwei kin wan tei mot, ngi donkam ba ka Sorkar kan pyndep la ka kamram. Ngi ngeit ba Sorkar kan nud ha kane ka kynti ban leh da ki kam ym ban kut tang ban shu pynbiej,” u la ong.