Lada jop, kular U bah Sanbor ban weng ia ka jingeh tih dewiong

Shillong: U Bah Sanbor Shullai ha ka jingialang paidbah bad ha ka jingialang ka party jong u kaba la pynlong ha Jowai, Khliehriat, Dawki, Amlarem, Pynursla bad Mairang u la pynpaw ka jingbynniaw kaba jur haba u iohi ia ka jingduna jong ki kam pynroi ha kine ki thain. Haba iakren bad ki nongshong shnong jong kine ki thain u Bah Sanbor Shullai u la ong ba ki shnong nongkyndong ha kylleng ka ri India, mynta ki la lah ban ioh ia ki surok rong lyngba ka PMGSY schemes (Pradhan Mantri Gram Sadak Yojna) ba la sdang nyngkong da u Myntri Rangbahduh ba rim ka India u Atal Bihari Vajpayee. Hapoh kane ka PMGSY Schemes ka sorkar jylla ka ju ioh sanction palat ia ka 900 Klur tyngka na ka bynta ban pynrung ia ki surok rong sha ki jaka ba kyndong ki thain nongkyndong. U Bah Sanbor Shullai u la kdew ia ki mat ba kongsan sha ki paidbah shaphang ka roi ka par ha ka thain Northeast naduh ka jingwan ha ka bor sorkar u Modi naduh u snem 2014. U Bah Sanbor u pyntip sha ki paidbah ba ka sorkar BJP mynta ka phai khmat bha na ka bynta ka roi ka par ha kine ki thain lyngba ka kam jingoh kai namar lyngba kane, kan ai jingmyntoi shibun ia ki paidbah kine ki thain bad kumjuh ka jylla kan ioh ban lum shibun ka pisa. U la pynpaw shuh shuh ba ka sorkar BJP hapoh ka jingialam u Myntri Rangbahduh ka Ri u Narendra Modi kan thaw sorkar ha Delhi bad ka BJP MP na Meghalaya kin ai lad shibun ia ka jylla Meghalaya kaba la mad khah khah ia ka jingduna ha ka mang tyngka. U Bah Sanbor u la kdew ruh ia ka mat kaba kongsan bha kaba dei u ia ka jingtih ia u Dewiong ha kaba dei tang ka sorkar pdeng kaba lah ban weng ia ki jingeh kaba ki trai dewiong ki la mad. U la pynshai ba ka Ministry of Mines and coal ka lah ban pyndonkam da ka Para 12 A(b) jong ka sixth scheduled lyngba ka jingai bor na u President ban weng noh ia ka jylla Meghalaya na ki ain khang tih dewiong. U Bah Sanbor Shullai u la pynthikna ba lada ki paidbah kin jied ia u, ka kam ba kongsan eh ka jong u ka long ban weng ia ki jingeh ha kaba iadei bad ka kam tih dewiong tang ha i por ba khyndiat. Haba ia kren bad ka jingkynthoh jong u Bah Ronnie V Lyngdoh u Bah Sanbor u ong ba ka kam ka kren kham jam ban ia ki kyntien bad tang u nongtrei paidbah uba bha u tip ia ka jingshisha bad ki briew kiba lap lap tang ha ka ktien kim lah pynmih ia u sohthiang.