Lada ioh te uba kwah suda, ong U bah Bindo

Shillong, 19 lyngkot:
Ki la mih ki khubor, ha ki khyndiat sngi ba ladep, ba ba ka UDP, ka don jingthmu ban thaw hi noh ia ka Executive Committee ha Khasi District Council ha kaba U bah HS Shylla, un long kum U Chief Executive Member ba thymmai bad halor kane U bah Bindo M Lanong, Senior Working President jong ka seng UDP, u iathuh ha U Rupang “Lada ioh te uba kwah suda” bad ula ong biang “Lada dei ban pyrshang ruh hap pyrshang” bad u ong shuh shuh “Lada shah ban sdang hap ia sdang”.
Lyngba kitei ki jingkren jong utei u nongialam ba rangbah jong ka seng UDP, ka pyni shai, ba katei ka seng trai ri, kam kyntait ba kan synshar dalade hi ia ka Khasi District Council, lada ka don ka lad.
Halor ka jingdon pat jong U MDC jong ka seng BJP, ha kane ka EC jong U bah PN Syiem, utei u rangbah, u ong “Ka dei ka bynta jong ka synshar synrop, ha kaba ki don ki seng, kiba ym bit ban ia rung ia mih ruh, hynrei ngi hap ban ia trei lang bad katei ka dei ka bynta jong ka kynhun synrop” bad ula iathuh ba ka UDP, ka la don bynta ha ka synshar synrop ha KHADC, naduh ka EC U bah Ardent, hadien U Bah Adelbert bad mynta ruh, ha ka por jong U bah PN Syiem namar ba ka UDP, ka kwah ia ka EC kaba skhem ha KHADC.
Halor ka jingkylli pat, ba ka BJP, ka dei ka seng, kaba kwah ban khang bam doh masi lane kaba kwah ban pyntrei kam ia ka Uniform Civil Code, lane kawei ka Ri, kawei ka riti dustur, U bah Bindo, ula ong “Lada ki la mut ban khang te ngin sa pyrshah, namar ba ka pyrshah ia ka riti dustur”. Ha kajuh ka por, U bah Bindo, u ong shuh shuh ba U bah Antonio War, ula don ha ka EC ha KHADC, kum u dkhot jong ka seng Congress, hadien kum u dkhot shimet bad mynta kum u dkhot jong ka seng BJP bad u ong ruh “Ngi la don shwa ma ngi ha ka kynhun synrop ha KHADC”.
U MR, um tip shaphang ka ain
Ha kajuh ka por, U bah Lanong, ula ong shuh shuh, ba um iahap jingmut satia, ha ka jingpynmih khubor mynta ka sngi, ha kaba U Mukul Sangma myntri rangbah ka Jylla, ula ong ba lada ka jingbishar ka suki, ka dei ka kamram jong kitei kiba shem shitom, ba kin leit ban ujor sha Kashari. Halor katei ka phang, U bah Bindo, u ong “U kapten, uba rim jongnga, um sngewthuh ia ka ain” bad u ong ruh ba lada ki Kashari, kim ai ai ka rai kaba khun, kam dei ia u myntri rangbah, ba un shu shong bad shu peit, hynrei u dei ma u, u ban wad ia ki lynti ban pynbeit ia kitei ki jingeh. “Um tip ia ki kam ain bad ula dei ban kylli na ki Advocate General, ba kin ai jingmut” ong shuh U bah Bindo “Ha ka por ba nga long u myntri jong ka tnat ain, nga shait pasiaw ia ki nongbishar bad pynsngew ia ka jingmut jong ka sorkar”.