Lada ieh Congress ruh, yn nym pyniasoh bad ka Trinamool, ong U bah Process

Shillong:U Bah PT Sawkmie, nongialam rangbah jong ka seng Congress, uba long ruh u City President ka party, u la ong ba ia ka rai la un dang iaid neh lane ba un ieh noh ia ka party Congress kan long ha ka por ba biang, hynrei lada u shim ia ka rai ban ieh noh ruh un ym treh ban pyniasoh ialade bad ka Trinamool Congress, namar ba kane ka party kam don ia ka lawei ha ka jylla.

Haba ia kren bad ki lad pathai khubor, u bah Sawkmie u la ong ba un ym lah ban kren na ka bynta kiwei pat ki MLA kiba dang don ha ka party Congress, hynrei kum u nongialam un dang bteng ban neh bad ka party Congress haduh ban da kut kane ka samoi trei kam bad ia ka rai ba un dang neh bad ka party Congress lane un iehnoh un sa shim da la dei ka por ba biang na ka bynta ka jingbha ka Constituency jong u.

Haba buh ia ka jingkylli u bah Sawkmie, u la ong ba ban ia mynta hi un ym lah ban kren lupa namar ba mano ban lah ban pyrkhat kum u nongialam barim jong ka party Congress u Dr. Mukul Sangma, un iehnoh ia ka party kumta, u ruh un nym lah ban tip ia ka ban sa wan.

Haba buh jingkylli ba hato u bah Sawkmie, ruh un don ka mon ban pyniasoh ia lade bad ka TMC, ynda la biang ka por, u bah Sawkmie u la kyntait ban pyniasoh ia lade bad ka party TMC da kaba ong “Ha ka jingsngew jong nga, ka party TMC kam don ia ka lawei ha ka jylla, kane ka party ka shu paw mynta tang shipor, hynrei kane ka party kan sa jah noh hadien ka election”.

U MLA ka Mawlai Constituency u bah PT Sawkmie u la ong ba ka party TMC kan dang shim por ban paw ha baroh kawei ka jylla, ha kaba ki MLA jong ka kin hap ban pyni shwa ia ki kam ba ki don na ka bynta ban shakri ia ka jylla.
U bah Process u la ong ruh ba ki nongshong shnong khamtam ha Khasi bad Jaintia kin ym ai ia ka jingkyrshan ia kane ka party ha kane ka election ka ban wan.

Ha ba ia kren ha lor ka jingpynkhlain biang ia ka party Congress na ka liang u bah Sawkmie, u la ong ba ban pynkhlain biang ia ka party hi ha baroh ka wei ka jylla, yn hap ban ia kynduh bad ia syllok bad ki nong kitkam ha baroh kawei ka constituency.
“Ngin hap ban pynkhlain shwa ia ki block ha ki thain jong ka nongbah Shillong, namar ba ki don ia ka bynta ka ba donkam tam” bad u la iathuh ba mynta hi bun na ki block kim don ia ki nong kitkam bad kumta kaba donkam hi ka long ban thung shwa ia ki nong kitkam.