Lada ha ki 10 sngi, ka jingpang kam hiar ka sorkar kan sa shim shuh shuh, ia ki lad kiba pyrkhing

Shillong:U Director ka tnad ka koit ka khiah u Dr Aman War, u la ong ba wat la ka sorkar jylla, ka la shim ia ka rai ban pynjari da ka Containment Measurement ha ka jylla na ka bynta ka 10 sngi ban teh lakam ia ka jingsaphriang jong ka khlam Covid-19 ha ka jylla hynrei lada kane ka khlam ka dang kiew sted ka sorkar jylla kan hap shim biang ia ki rai ki ba kham eh.
Haba ia kren bad ki lad pathai khubor, ha ka jingialang ban pynshai halor ka jingdonkam ban ioh ia ka Vaccine u la ong ba lada ka jylla kan ym don shuh tang uwei ruh u nongpang Covid ha kata ka por ia ka jylla, yn sa lah ban ong ba ka jylla ka la lait na kane ka khlam.

Ban lait na ka ne ka khlam ka dei ha ka kti jong uwei pa uwei u nongshong shnong ban phikir bad bud ia ki jingbthah ba la pynmih da ka tnad ka koit ka khiah bad ka ba donkam tam ka long ban ai tika bad tang kane ka ba lah ban pynkut ia kane ka khlam ha ka jylla.
U la ong ruh ba kan kut kane ka khlam kan dei ha ka por ba 90% ki briew ha ka jylla kin ioh ia kane ka Tikka ha ka ba ki la lah ban ialeh pyrshah hi ia kane ka khlam bad kane kadei na ka jingkhlain ka immunity ka ban ym lah shuh ban ia bit iwei na uwei.

U la pynshai ruh kum ba la iohi, ha kiwei ki jylla ba ki briew ki ba shah ktah ha kane ka jingpang khlem da ioh ia ka Vaccine, ka la long ka ba shyrkhei ha ka ba ka la wanrah ia ka jingiap kaba shyrkhei, hynrei haba ioh ia ka Vaccine kan pynkhlain ia ka Immunity, wat la kan don ka jingktha khlieh, shitmet kaba tang shisngi arsngi, hynrei kan iada na ka jingiap bad kane kan shong ha kti jong u paidbah ban jied.