“Lada don ka lynti, ka UDP kan shim ia ka lad”, ong u Bah Mawthoh

Shillong, 20 Nohprah:
Ka jingjop u Bah HS Shylla na ka UDP ha kane ka kynti, kan lah ban don sa ka jingkylla ha ka bor synshar ha KHADC ha kaba u CEM ba mynta u Bah Pynshngain N Syiem u lah ban khyllem.
Haba iakren bad u General Secretary ka UDP u Bah Jemino Mawthoh hynne ka sngi, u la ong ba ka UDP kam kyntait ban shimti ban ialam ia ka Executive Committee (EC) ha KHADC lada ka don ka lynti, hynrei ym ban shu iaknieh bor.
“Lada don ka lynti, ka UDP kum ka party, kan shim ban ialam ia ka EC ha KHADC”, la ong u Bah Mawthoh.
Hynrei ha kajuh ka por, u la ong, “Ka jingia-khih ban shu iaknieh ia ka bor,ban pynkulmar khlem ka daw kaba biang, kan nym long bad ka party kam kwah ia kata”.
“Lada ka rukom treikam jong u CEM, kam long kaba biang, ka UDP ka hap ban iakren namar ba kam mut ba tang ba la ong ban kyrshan ia u Bah Pynshngain, kan shu kyrshan matlah wat ia ka bym dei ruh”, la ong u Bah Mawthoh.
Hadien ba la jop u Bah Sylla na Nongkrem ha kane ka elekshon MDC shiteng samoi, ka la don ka jingiakren hapdeng ki paidbah ba un sa pynkhih pyrthei ha KHADC namar ba u Bah Shylla u dei uwei uba la ju satar bha ha ka kam pynkhih sain pyrthei.
“Ka UDP ka dei ka seng sain pyrthei kaba heh, kano kano ka seng sain pyrthei ka kwah ban don ha ka bor hynrei ka dei ban don ka lynti”, la bynrap u Bah Mawthoh.
U la ong ba kumba paw ka Campaign For Change (CFC) jong u Bah Pynshngain ruh ka la sdang ban leh politik ban leit ialap kylleng ki jaka. “Kine kumba ka paw, ki la leh politik”, la ong u Bah Mawthoh.
U la ong ba haduh mynta ka UDP ka dang kyrshan beit ia u Bah Pynshngain uba dang dei u Congress hi namar ba u dang shu shah sospon hynrei ym tip ioh un leit biang sha ka Congress ruh.
Ka UDP ka don 5 ngut ki MDC kynthup u Bah Teinwel DKhar, Bah Donkupar Sumer, Kong Rona Khymdeit, Bah HS Shylla, bad Bah Equator L Nongrang.
La sngewthuh ba ki MDC ka Congress kiba don 5 ngut, ki la long kiba kloi ban kyrshan ban ialam ka UDP ia ka EC ha KHADC.
U Bah Pynshngain u ialam ia ka EC mynta hapoh ka lama ka PDF ba kyrshan da ki MDC ka UDP, KHNAM, BJP bad ki MDC shimet bad ki lait noh ka Congress bad HSPDP.