Shillong: Katba kiwei ki nongialam ka Congress ha kane ka jylla ki la kyndit hynrei u MLA ka Congress na Mawlai, u Bah Process T Sawkmie u la ong ba ka jingmih noh u Bah Donwa Dethwelson Lapang na ka Congress, kam don eiei ban sngew phylla, hynrei tang kawei ka long ba lada ka Congress ka dang don ha ka bor, un nym mih satia.
“Lada ka Congress ka dang don ha ka bor, u Bah Lapang un nym mih namar ba kat ka kyrdan u Bah Lapang, ym donkam ban pan shuki ha ka sorkar hynrei ka sorkar ka la don lypa ban ai jaka ia u”, la ong u Bah Process.
U MLA ka Mawlai u la ong ruh ba kam don jingmut ban leit kyrpad ia u Bah Lapang ban wan phai biang sha ka party namar ba u dei uba la ih uba la rangbah bha, ula tip ia kaba dei ban leh.
“U Bah Lapang u la ih bha bad haba u rangbah u la pyrkhat, katb u Bah Lapang ban ai jingmut ma ngi kiba dang kham khynnah, kam iahap ban wan phai biang”, la ong u Bah Process.
U Bah Process u la ong biang, “Na ka liang jong nga, ngam sngew pher namar baroh ki seng sain pyrthei shisien ba ka party kam don shuh ha ka bor, kiwei kin pyrshang ban leit sha kiwei pat ki party ba don ha ka bor bad namar kata, ngam sngew phylla, bad ngam sngew lynngoh ia ka jingmih u Bah Lapang”.
Haba kyntait ba ka Congress ka la niew bein ia u, u Bah Process u la ong ba kane ka dei tang ka jingkynnoh ban ioh daw bad ka jingshisha ka long ba ka Congress ka la burom bad ai burom bha ia u Bah Lapang.
“Ka jingkynnoh ka dei tang ka daw ban ong ba ka leh bein”, u la ong bad bynrap, “Ka party Congress ka dei kaba burom ia ki nongialam bad kham niar, ki nongialam ban mih na ka party. Ha kaba iadei bad u Bah Lapang, ha ka por ba u rem MLA ha u snem 1993, la pyniakhun MP, la ai chairman ha ka State Planning Board, ha ka por ba ka Congress ka don ha ka sorkar, ka ai ia u ka kyrdan kaba biang, bad kam don kano kano ka jingleh bein ne niew bein”.
U la ong ba ka jingrai jong u Bah Lapang ban mih na ka Congress, ym don mano mano ba tip bad u la kam ba ka jingmih jongu kan nym don jingktah ia ka Congress namar ba ka dei ka party ka la rim, ki la don ki ktem ha baroh ki jaka. “Ka Congress ka khlem beh ia u hynrei u shu phet hi”, la ong u Bah Process.
U la ong ba u Dr Mukul Sangma ruh u burom bha ia u Bah Lapang kum u nongialam. “Mynshem taiew, u Dr Mukul u la ong ban khot bamja shwa ia u bah Lapang shwa ban khot ia kiwei ha ka por ba u kiew ing thymmai bad kane ka pyni ba u la burom bha ia u Bah Lapang”, la ong u Bah Process.
Ka Mawlai ka kylla ktem u drok
Ha kawei ka liang, ha kane ka sngi Saitjain, u Bah Process, u la pynpaw ia ka jingsngew khia ia ka jingkynrei ki nongdie drok ha ka thain Mawlai, kaba la buh ka jingma kaba shyrkhei ia ki longing longsem, ia ka imlang sahlang.
Haba kren ha ka jingplie ia ka mala kaba ar jong ka iing dorbar ha Syllaikariah, u Bah Process u la ong ba ka Mawlai mynta ka la kylla ka kum ka ktem u drok bad donkam ban iakhun pyrshah ia kane ka jingsniew kaba pynjot pynpra ia ka met, ka ing bad ka imlang sahlang.
U la khot bad kyntu ia ki kmie ki kpa ba ki dei ban sneng ban peit ia ki khun ban im ka jingim kaba bha.
“Kiba ha ing hasem kim dei shuh ban lehrain ban mih shakhmat ban iathuh lada don kiba haiing kiba ngop ha ki kam drok da kaba leit sha ka shnong ban iasyllok ban weng ia ka jingeh”, u la ong bad bynrap, “donkam ban iatreilang baroh ki seng longkmie, ki shnong, ki seng Samla ban ratdyngkhong ia kane ka jingsniew”.
Ha kane ka sngi, la don lang u Rangbah shnong Syllaikariah u Bah C Shullai, ki nongkitkam shnong nalor ki seng longkmie, bad kiwei.
Ia kane ka dorbar hall kaba la pynkha shuh ka mala kaba shajrong na ka MDC scheme ha ka jinglut kaba 15 lak.