![](https://www.urupang.com/wp-content/uploads/2024/07/image-70.png)
Shillong:Ka jingdon marwei kum u MP ha Parliamentary kan ym pynsngew tmang eiei ia u Dr. Ricky Andrew J Syngkon, hynrei ka pynsngew sarong pynban ba un ioh ban kren ia ka jaitbynriew.
Ha kajuh ka por, u la ong ba kam don jingpher lada don ha ka liangpyrshah ne ha ka liangsynshar, kum ki shakri paidbah, kin hap ban shakri ia u kynrad uba dei u paidbah.
“Kam da dei eh ban ieng ba don ha ka liangsynshar ne ha ka liangpyrshah, ban ieng marwei lei kan long kaei kaei kaba sngew sarong ban rah ia ki mat ba ka jaitbynriew ka donkam”, la ong u Dr. Ricky.
“Kiba don ha ka sorkar ruh ki dei ki shakri ki paidbah, kiba don ha ka liangsynshar ruh kiba shakri paidbah, ka kamram u shakri ka long ban trei na bynta ki kynrad u paidbah” u la bynrap.
U la ai nguh ia u Blei uba la ai ia u kane ka lad bad ia ki paidbah kiba kyrshan ia u ban long u MP ban iasaid ia ka jaitbynriew.
“Nga ai nguh ia u Blei uba la ai nga kane ka lad, bad ka jingkyrshan jong u paidbah ban ai ka jingjop ia ka VPP ha ka elekshon MP ba la dep. Nga shim kum ka rai rangbah kum u nonghikai namar nga don ki shkor, ki khmat, ki kjat bad ka jingpynkhih ia ka dohnud jong nga. Kum u nonghikai nga shim ia ka jingkitkhlieh na ka bynta ka lawei”, la ong u Dr. Ricky.
U la ong ba ka jingkren ba nyngkong jong u ha Parliament, u ieng ban kren ia ki nongrim jong ka jaitbynriew, ia ka jinglong ka synshar khadar, kaba la synjor katkum ka riti synshar ka ri India, bad un ieng ban iai kren bad kyrmen ba ka jingdon ka VPP kan long ka tyndong jingsawa ia ka ri India bad u kwah ban iohi ia ka ri India kaba kiew kumba la angnud u PM u Modi ha 2047 hynrei kan long ba eh lada ym burom iwei ia iwei bad ia ki rit paid.
Phi don ban ong eiei?