Lada deng mask slem, ngam lah shuh ban ring bad pynhiar mynsiem, ong u myntri

U Narottam Mishra, myntri kam poh iing ka Madhya Pradesh, ula pan map mynta ka sngi, namar ba um deng mask bad katei ka jingleh jongu, ka la pyn bitar ruh ia ki dkhot liang pyrshah ha katei ka Jylla.

Ha ka sngi balang, ki nongthoh khubor ki la kylli balei ba um deng mask, haba u leit sha ka jingialang paidbah, U Mishra, uba la leit sha Indore, na bynta kawei ka prokram, ula ong “Ngam deng mask ha baroh ki prokram. Te sa lei ka”.

Mynta ka sngi pat ula thoh ha ka twitter jongu, da kaba u ong “Ka jingkren jongnga, halor ka jing bym deng mask, ka long kaba pynkhein ain. Ngan deng mask nangne shakhmat bad nga khot ia kiwei ruh ba kin deng mask bad ia jngai iwei ia iwei pat” ong U Mishra.

U Mishra, u iathuh shuh shuh ba ha ka jingshisha, u shait deng mask “Bunsien, nga shait deng mask, tangba ngam lah ban deng slem, namar nga don ka jingpang polypus bad lada nga deng slem, ngam lah shuh ban ring bad pynhiar mynsiem” ong U Mishra. Ha Indore, ka Indore Municipal Corporation (IMC), ka dain kuna T.200 ia ki bym deng mask.