Lada dei sha kano kano ka thaiñ ruh ka KSU kan ym shah ban wanrah rel kat ba ym pat Don ki aiñ ban iada

Shillong 3 Lber :  U President ka Khasi Students Union ( KSU) u bah Lambokstar Marngar u la kren shai ba ka Seng kan ym pdiang ia ka jingthmu  ka sorkar ban wanrah ia ka rel ha kano kano ka thaiñ ruh Jong  ka bri u Hynniewtrep, kat ba ka Sorkar kam pat lah ban wanrah ia ki aiñ ban iada .

Haba kren bad ki ladpathai khubor u bah Lambokstar Marngar u la ong ba “ka mat lynti rel ka dei ka mat ba ka KSU ka la ieng pyrshah da ki phew snem namar ngi iohi bun ki jingma ki ba ap lada ym pat Don ki ain ki ban iada ia ka jaitbynriew, ha u snem 2017 ka la don ka jingthmu ka sorkar ban pynpoi lynti rel ha Byrnihat RiBhoi District ha kaba ka seng ka la ieng pyrshah” .

” Mynta ruh nga iohi ba ka sorkar ka don kata ka jingthmu ban pynpoi lynti rel sha Jaintia Hill, da long kat ba long ruh ka KSU kan ieng pyrshah ia kane ,kaei ba ngi khmied lynti na ka Sorkar ka long ban pynurlong ia ka resolution kaba ka la dep pdiang hapoh ka ing dorbar ha u snem 2019″ u la bynrap .

U bah Marngar u la ong ba Ka jingkhmied lynti Jong ka jaitbynriew ka long ba ka sorkar ka dei ban leit sha Delhi ban ia kren ia ka ILP hynrei i kumba ki leit Delhi ban iakren ban wanrah lynti rel sha ka Jylla.” kumno ngin khmied lynti ba kata ka juh ka sorkar kam pyrkhat ban iada ia ki nongshong shnong ha ka jylla” u la bynrap.

“Ka seng ka kren da ka ba shai ba lada ka sorkar ka thmu ban iaid da ka bor ia kane ka kam ka por kan sa batai ladahap ban tyngkhuh ha madan ruh , namar ngim kwah ban ialehkai bad ka kawei ka jaitbynriew.Ka Sorkar ka lah ban ia kren halor kata ka roi ka par , hynrei ka jingkylli ka long mano ban roi mano ban par , ngi sngew ban ong ba ka dei ban pynkhlain shwa ia ki ain ki kanun ban iada ngin sa ia kren halor ka rel ha ka Jylla” u la ong .

Haba kylli u la ong ” Lada ki ong ba ha Byrnihat ki la pynsangeh kata ka jingthmu ban wanrah ia ka lynti rel hynrei ka KSU ka kren shai ba la ka dei hakano kano ka thaiñ ruh kaba dang hap hapoh ka Bri u Hynniewtrep ka KSU kan ym pdiang . Ka Sorkar ka dei ban pynbeit jingmut shwa ban pynkiew ia ka pule puthi ha ka Jylla , ban Kyntiew ia ki jaka sumar ban pynbha ia ki Surok ki lynti synkien, bad ban leit ban kren halor ka jingdawa ILP ha ka Jylla ym ban kren halor ka lynti rel, kat ba ym pat ioh ia ki aiñ ban iada ia ka jaitbynriew” .