Shillong: Ka kynhun ki sengbhalang ka dong mihngi ka India hapoh ka lama ka North East Students Organisation (NESO) ka la byrthen ia ka sorkar pdeng ban pynjur ia ka jingiakhih lada kan pynlong ain ia ka Citizenship Amendment Bill (CAB).
Haba kren hynnin ka sngi ha ka jingiakhih shong kyrain ha phyllaw ka Additional Secretariat Shillong ba la iashim bynta ki seng bapher bapher hapoh ka jingialam ka KSU bad GSU, u chairman ka NESO u bah Samuel Jyrwa u la maham jur ba ka la dei ka por ia ki samla kane ka dong mihngi ban kyndit bynriew ban iakhun pyrshah ia ki ain ka sorkar pdeng kiba thmu ban iuhroit bad thombor.
U la ong ba ka nuksa ka jingma ka la jia ha jylla Tripura ha kaba ki trai shnong ki la kylla long ki rit paid na ka jingwan buhai shnong kiwei pat ki jaitbynriew bad kim lah shuh ban iada ialade.
Haba kyntu ia ki samla ban ieng na ka bynta ka ri, u bah Samuel u la ong, “Lada ailad ia ka CAB, sa tang 20 snem ka jylla Meghalaya kan sa kylla kum ka Tripura ha kaba ki trai shnong kin sa kylla rit paid bad ki mynder kin sa synshar kylla”.
Ha kane ka sngi la ioh ruh ia ka jingkren na ki nongialam sengbhalang bapher bapher kiba wan ban iashim bynta.
Mynta ka sngi ki sengbahalang hapoh ka lama ka NESO, kila pynlong ia ka jingiashong kyrain kaba shi sngi ha phyllaw ka Additional Secretariat, Shillong ba la ialam da ka KSU bad ka GSu ban pyrshah ia ka jingthmu ka sorkar pdeng ban wanrah biang ha parliament ban pynlong ain ia ka CAB.
Ka CAB ka thmu ban pynlong nongshong shnong ia ki Hindu, ki Sikh, Buddhist, Jain, Parsi bad Khristan kiba wan sha India sha u snem 2014 na Bangladesh, Pakistan bad Afghanistan.
Ha kane ka jingiashong kyrain la wan iashim bynta ki seng kiba don tnat ha kane ka jylla na ka kylleng kane ka dong mihngi nalor ki sengbhalang kiba don ha kane ka jylla.
Ka jingshong kyrain la pynlong naduh ka por 12.00 shiteng sngi haduh 4.00 baje nohphai sngi ryngkat ki plakad, ki jingthoh ban pynrem jur ia ka sorkar pdeng.
Ki dkhot kine ki sengbhalang kila ia pyrta ruh ban pynrem ia ka sorkar pdeng ka BJP, ia u Myntri Rangbahduh ka ri u Narendra Modi, u myntri ka tnad kam pohiing u Amit Shah.
Ki seng ki ban wan ia shim bynta ki long kum ka kum ka Federation of Khasi Jaintia bad Garo People, Hynniewtrep National Youth Front, Ri Bhoi Youth Federation, Arunachal Students’ Union Shillong, Shillong Socio Cultural Assamese Students’ Association, Mizo Students’ Union, Naga Students’ Union, Twipra Students’ Federation, Shillong Karbi Students’ Association, All Bodo Students’ Union bad kiwei kiwei.
Phi don ban ong eiei?