“Lada ai ei sha karkhana, balei ym pyllait pynlip bording sha hospital”

Shillong,
06 Rymphang:
Ka jingpynlip bor ding (light) ka MeCEL ka la ktah ia baroh ki briew ki kam ki jam ha baroh kawei ka jylla. Hynrei napdeng kine, kiba kham ma bad kham ktah eh ka dei ia ki jaka surmar ne ki hospital kiba hap ban ai jingshakri khlem sangeh satia baroh 24 kynta.
Hynrei ka la mih ka jingkylli na ki paidbah, ba lada ka sorkar ka lah ban ai bording ei ia ki kar khana kiba bam ramhah, ka la dei ban don la kawei pat ka rukom pyrkhat ia ki jaka surmar ne ki hospital ruh kiba donkam palat haduh katta.
Hynne ka sngi haba iakren bad u Rupang u Medical Superitendent ka Robert Hospital, Jaiaw u Dr David D Tariang u la ong ba ka jingpynlip bording ka ktah bha khamatam ha ka por ba ki dang ai ka jingsumar ia ki nongpang bad la ong ba hapoh Hospital don ki kamara ba ki donkam ia ka bording bad miet bad sngi kum ha ki kamra buh khyllung, ha Operation Theatre (OT), Blood Bank, ICU (Intensive Care Unit), Emergency room bad ha kiwei kiwei ruh ki jaka.
“KIne ki bynta ha Hospital kim dei ban jah bording namar ban ktah lada lip”, la ong u Dr Tariang.
U la ong ba haduh mynta ka MEeCL haba ka pynlip bording kam ju phah jingpyntip kyrpang ha ki Hospital, hynrei la shu iohi lyngba na ki lad pathai khubor.
Namar ka jingpynlip bording ka Hospital ka hap ban pynlut da ki lak namar ban pyntreikam da u transformer khanang ba ki kam kin nym thuh ha ki Hospital.
Katkum ka jingong u Dr Tariang la ong ba lada ka sorkar ka lah ban pynlait na ka jingpynlip bording ia ki Hospital kan long kaba bha eh.
“Nga tharai lada ka sorkar ka mon ban leh ia kane ka lah ban leh”, la ong shuh shuh u Dr Tariang bad u bynrap ba ka sorkar ban pyllait na ka jingpynlip bording ka lah ban ai noh ia ki Hospital da ka jong ka lain.
Lah ban kdew ba ka MEeCL ka la pynlip bording ar kynta bad miet bad sngi ha man ki thain jong ki jaka bapher bapher khnang ban lait na ka jinglut bording.