Shillong 18 Rymphang: Ha shwa ka sngi ba ki paidbah ka Khasi Jaintia kin ioh ban jied ia ki nongmihkhmat Jong ki , na ka bynta ka Khasi Hill Autonomous District Council (KHADC) bad ka Jaintia Hill Autonomous District Council (JHADC ) Ki nongialam ka Synjuk ki Rangbah kur ka Bri u Hynniewtrep,mynta ka sngi ki la wan ban kyntu ia ki paidbah ban jied ia ki nongmihkhmat da ki briew ba lah ban pynkhlain ia ka 6 th schedule.
Ha ba kren sha ki ladpathai khubor, ha Shillong Press club u bah Erwin K Syiem Sutnga , Working President ka Synjuk u la ong ba hashwa ba paidbah kin ioh ban thep ia ka vote Jong ki , ban jied ia ki nongmihkhmat sha ki Autonomous District Council , la iohi ia ka jingialap election kaba pynmih ka jingkulmar ha ki paidbah, ia ki ba dang shongshit dang shongshit ia ki ba dang pyrkhat jylliew pat ki dang pyrkhat jylliew , khamtam ha kaba ia dei bad ki mat kiba ki sengsainpyrthei ki wanrah .
“Ka jingthmu Jong ka Synjuk ka long ban Pyni lynti ia ki paidbah kumno ban jied ia ki nongmihkhmat , Kum ka wei na ki thymmei pyrkhat ka jaitbynriew ban saindur ia ka sainpyrkhat ,Jong ki paidbah khamtam Jong ki kur ki pyrsa kur namar ba dei ki kur kiba pynlong ia kawei pakawei ka jaitbynriew” u la ong .
“Kum ka Synjuk ngi kyrpat ia ki jaitbynriew ban pynshong nongrim bha ia ka 6th schedule namar ba ka dei ka stied jong ka jaitbynriew kaba la palat ia ka 70 snem mynta ba ka la trei kam, ka don ki jingduna hangne hangtei , kiban shen yn sa lah ban dang pynbha hynrei ha kaba iadei bad ka jingthep vote ha ka 21 Tarik Rymphang ngi kyrpat ia ki paidbah khamtam ki khynnah samla ban ym pynduh ia ka jingithuh ka jaitbynriew ai jait kmie , ngim dei ban pyrkhat ban ioh ban leh kat ba mon , na ka Liang ka Synjuk ka Maham ioh wan ka sang ka ma ” u la bynrap.
U bah Sutnga u la ong ba lada Kum u paidbah kin bakla ban jied ha ka 21 Tarik kan plie ka jingkhang khamtam ia kita ki ba kwah ban ia jaitkpa, ai jait meikha kin ioh ka lad ka lynti ban rung hapoh ka District Council, kane kan wanrah jingeh ia ka jaitbynriew baroh ka wei .
U la kyntu ruh ban jied da ki nongmihkhmat kiba sngewthuh ia ka 6th schedule,”ki ba sngewthuh ba ngi don ia ka bynta ka ba kyrpang hapoh ka imlang sahlang , bad ha Autonomous District Council ym ju don party hynrei dei ban ailad ia ki briew ba kin thaw ia ka Executive Committee (EC )hapoh ka nongrim ai jait kmie ha ka juh ka por kiban iada ia ka khyndew ka shyiap bad Kiwei Kiwei” .
“Nalor kane dei ban bishar ia ki nongmihkhmat kiba phi jied lyngba ki kam Jong ki , ki nongmihkhmat ki dei ban long kiba kloi ban iarap ia u paidbah ia ki ba duk ba suk , hap ban peit ia ki nongmihkhmat kiba don ka jingiadei kaba Jan bad ka Sorkar , kane kam mut ba phin jied ia ki kyrtong ka NPP hynrei jied ia ki briew kiba bha kiba don mynsiem ban iarap” u la ong .
U bah Erwin u la kyntu ba Ki paidbah ki donkam ban peit ia ki briew kiba lah ban donbynta ban wanrah ia ka jingkylla ka ba 125 Amendment Jong ka 6 schedule , khamtam na ka Synjuk ki la rah ia ka mat ban pynrung ia ka jingshimjait kmie hapoh ka State chapter.
Phi don ban ong eiei?