La weng noh ia ka hukum khangdam na ki ar tylli ki dong jong ka Shnong Pyndengumiong, Mairang

Mairang: U Sub-Divisional Magistrate ka Mairang Civil Sub-Division, Mairang ha ka hukum ba la pynmih mynta ka sngi u la pyntip ba hadien ba lah dep test lut ia baroh ki High Risk Contact bad hadien ba la lah pyndep ia ka ‘Vaccination Drive’ ha ka Dong Umwiehsup bad ka Dong Langstiehrim jong ka Shnong Pyndengumiong la weng noh ia ka hukum khangdam na ka bynta kitei ki ar tylli ki dong naduh mynta ka sngi ka 9 tarik u Nailur, 2021.

Katkum kane ka hukum, ki dukan ha baroh kawei ka shnong Pyndengumiong kin sdang plie biang kumba ju long naduh ka por 7 baje mynstep lashai ka sngi ka 10 tarik u Nailur 2021 bad ki paidbah ki dei ban iai bud pyrkhing ia baroh ki jingbthah jong ka sorkar ha kaba iadei bad ki lad iada na u khniang jingpang COVID-19.