Shillong: Hapdeng ka jingsngewsih kiba ha iing ha sem Ia tep donburom ia ka met ba dangsah jong ka kong Larisa Ïawrot, mynta ka sngi ka 15 Naiwieng 2023 ha u lum jingtep shnong Kenbah Malai.

Ha kane ka sngi leit ontep la iadonlang kiba haiing hasem, ki kur ki kha, ki paramarjan marpa, bad kiwei kiwei.

Ha shwa ban leit ontep ia kamet la leh donburom khatduh ha iingsah kaba don ha Kenbah Malai ba la pyniaid hi da kiba haiing ha sem bad la ialam jingduwai na u Tbn SK Syiemiong bad duwai pynwai na u Tbn J Lyngkhoi.

Kum ban shypynkynmaw ba kane ka longkmie ba la tip kyrteng ka kong Larisa Iawrot, ka la khlad noh ha ka 13 tarik mynta u bnai, hadien ba ka shah tynrah ha kawei ka thuk thuk ka ba la iaid pynsted, ka ba don ia u number ML 05 AA-6505 katba kane ka longkmie ka dangthmu ban jam sha shiliang ka surok ha Mawlai mawdatbaki.

Une u khynnah u la leit tynrah beit beit ia katei ka longkmie haduh ba kan kyllon ha madan bad ha ryngkat ka jinglyngkien ka snam.

Kane ka longkmie ka dei ka ba shong ba sah ha Mawlai Kynton Massar ka ba trei ha kawei ka skul ba kyrteng ka KC school bad ka shnong trai ka dei na Kenbah Malai East Khasi Hills District ka ba hap hapoh ka Mawsynram Konstitwensi.

Katkum ka jingsakhi ki paidbah nongleit nongwan ba katei ka longkmie ka la mynsaw jur na ki bynta jong ka khlieh bad ka khlem tip briew shuh. Kumta hadien ba la pynkit noh sha hospital, la pyntip ba katei ka longkmie ka la khlad noh namar ka jingjur palat ka jingmynsaw.