La tep don burom ia U Bah Friday Lyngdoh

Shillong, 28 Nohprah:
Ia ka met jong u MLA bad myntri sorkar barim ka jylla u Bah Friday Lyngdoh la tep don burom mynta ka sngi Nyngkong ha lum jingtep ka Balang Mawkhar.
Ki nongialam ka party Congress naduh ka President ka AICC ka Sonia Gandhi  ka la phah ia ka khubor sngewlem sha kiba haiing hasem jong u Bah Friday.  Na ka liang u Myntri Rangbah ka jylla u Dr Mukul Sangma ruh u la phah ia ka khubor sngew lem sha kiba haiing hasem jong une u nongialam ka party Congress namar ba um shym la lah ban wan namar ki daw bym lah kiar. Ia ka shithi ka Sonia la pule da u president ka MPCC u Bah DD Lapang katba ia ka shithi jong u Mukul Sangma la pule da u para jongu u Zenith M Sangma.
U Bah Friday u la khlad noh ha ka 24 tarik Nohprah ha ka rta kaba 86 snem. Shwa ba un iasoh sha ka sain pyrthei u la shakri shwa kum u nongtrei sorkar bad hadien u la rung sha ka sain pyrthei bad shah jied kum u MLA na Mawkhar bad long ruh kum  u myntri sorkar.
U la bat ruh kum u president ka MPCC ha kine ki snem ba la dep. Ka jingkhlad jongu, ka dei ka jingduh kaba khraw ia ka imlang sahlang namar ba u dei uba la noh synniang shibun ban kyntiew ha kiba bun ki liang.