|
Shillong: Ka Shillong Lajong FC kan iakhun ia ka Aizawl FC ha kane ka sngi u Blei ha JN Stadium, Shillong por 5baje janmiet.
Kane ka jingialehkai kan dei kaba sdang jong kine ki ar tylli ki kynhun na kane ka dong mihngi ha kane ka aiom ialehkai ka I-League 2018/19. Ka jingdie ia ki tiket kan sdang naduh lashai ka sngi Saitjain bad lah ban thied na The Mobile Centre Khyndai Lad bad na SSA counter ha madan Polo. Ka dor jong ki tiket ki long VIP (West) – Rs 500, D1 Covered Gallery (West) – Rs 100, D2 Covered Gallery (West) – Rs 100, D3 Covered Gallery (East) – Rs 50, D4 Covered Gallery (East) – Rs 50, E1 Covered Gallery (East)- Rs 70 bad C (Open gallery east) – Rs 30. Ka Aizawl kan mih na nongbah Aizawl ha ka sngi u Blei bad kin poi ha kajuh ka sngi ha Shillong. Ha ka jingiakhun kaba la dep mynshem snem ha Shillong, ka Lajong ka la jop da 2-1 ia ka Aizawl. Ka Lajong ka la pynkhreh bha ban iakhun ia kane ka kynhun na para thain dong mihngi ka ri. Ha kane ka aiom ialehkai ka 2018/19 i-league, ka Lajong kan sei ia ki nongialehkai kiba na kane ka ri bad kiba bun ki dei na kane ka dong mihngi bad kam don satia ki nongialehkai nabar ri. Ki nongialehkai ka Lajong ki long 10 ngut na Meghalaya ba kynthup ia u Kynsailang Khongsit, Allen Lyngdoh Nongbri, Aiban Dohling, Habymmutshuh Nongrum, Kenstar Kharshong, Hardycliff Nongbri, Phrangki Buam, Freestar Kharbangar, Samuel Lyngdoh Kynshi bad u Sheen Sohktung. Ar ngut na Sikkim ba kynthup ia u Phurba Lachenpa bad u Novin Gurung katba lai ngut na Mizoram ba kynthup ia u Samuel Lalmuanpuia, F.Lahrohlua bad u Lalawmpuia. Lai ngut ki dei na Manipur ba kynthup ia u Naoroibam Romen Singh, Bonison Nongmaithem bad u Mahesh Singh. Uwei na Nagaland u Neithovilie Chalieu, uwei na Tripura u Parvaj Bhuiya bad uwei na Assam u Rakesh Pradhan. Ia ka Lajong yn ialam da u coach u Bah Alison Kharsyntiew. |
