La sngi thohdieng, yn iakynduh ki sengbhalang halor ka ILP

Shillong, 10 Naitung:
Ki sengbhalang ba pher bapher jong ka ri Khasi Jaintian kin sa shong jingialang ha kane ka sngi Thohdieng ban iakren ia ka jingbym lah ka sorkar ban shim ia ki lad ki lynti ban tehlakam ia ka jingwan tuid ki briew sha kane ka jylla.
“Ngi la ap slem ia u Myntri Rangbah Dr Mu kul Sangma ban khot ia kren ia ngi halor kane ka kam. Ha ka jingshisha, u Myntri Rangbah u la pynthikna ha ki sengbhalang kham mynshwa ba un sa iakynduh biang shen hadien ba la wai ka dorbar mang tyngka. Hynrei haduh mynta, kam don kano kano ka dak kaba thikna na u Myntri Rangbah”, la ong u president ka FKJGP u Bah Joe Marwein.
U la ong ba ki la ap ia ka por kaba biang ia u Myntri Rangbah ban khot iakren ia ki sengbhalang.
“Ngim lah ban iai shah ban ap namar ba ka kam ka long kaba khia kaba iadei ka iap bad ka im jong ka jaitbynriew jong ki trai jaka trai muluk” la ong u Bah Joe.
U president ka FKJGP u la ong ruh ba kin sa shim ia ka rai ban pynbna da ki jingiakhih ha katei ka jingialang ban pynbor ia ka sorkar ba kan pyntreikam noh ia ki lad ki lynti ban tehlakam ia ka jingwan tuid ki mynder sha kane ka jylla