Shillong, 14 Jylliew:
Ha ka sngi saitjaiñ jong ka taiew ka 18 tarik u jylliew kan don ka jingialang bah ka seng Hynniewtrep Youth Council (HYC) ha ophis treikam jong ka ha Mawlai Polytechnic ha ka por 12 baje mynsngi. Katkum ka kyrwoh khubor na u Organising Secretary katei ka seng u bah Nickson Dohling u la ong ba ha katei ka jingialang la khot lut ia baroh ki President, ki Secretary jong ki Unit bapher bapher, ki Circle bad ki district ba ki dei ban poi khnang na ka bynta ban ia kren kumno ban pyntyllun noh shakhmat ia ki ishu ba katei ka seng ka la shim.
Lah ban pynkyn maw ba kham ha shuwa ia kane, ha ka jingiakren bad u Rupang ki nongialam ka seng HYC ki la ong ba shen kin sa sdang noh ia ka jingiakhih ban dawa Inner Line Permit ( ILP) ha kane ka jylla ha kaba kin sdang ia katei ka jingiakhih da kaba sam paidbah shuwa da ki kot lyngkdop kiba la thoh shaphang ki aiñ pyrkhing mynder ri bad ki aiñ pyrkhing bar jylla bad ha kitei ki aiñ kiba yn pynsngewthuh paidbah ka ILP ka dei kawei na ki mat ba katei ka seng ka la kdew ha katei ka kot lyngkdop.
Lah ruh ban pynkynmaw ba ha katei ka jingiakren ki nongialam katei ka seng ki la ong ba kin sdang noh ia katei ka sienjam ba nyngkong jong ka jingiakhih mynta ka taiew, hynrei la sngewthuh pat ba kin ym pat sdang mynta ka taiew namarba ki kwah ban pynbeit janai bha ha ka jingialang kaba yn shong pyrkhat da ki nongialam jong katei ka seng ha ka sngi saitjaiñ. Ha ka kyrwoh khubor ym shym la kdew la katei ka jingialang ka dei ne-em ka jingialang pyrkhat jingiakhih ILP, hynrei ka jubab kaba shai kan dei beit ha ka sngi saitjaiñ la katei ka jingialang kan dei ka jingshim rai rangbah ban ia khih ILP?.
Phi don ban ong eiei?