|
Shillong: Ka Shillong Lajong kan pdiang ia ka Mohun Bagan ha ka lympung I-League ha ka jingiakhun ban long ha ka sngi Saitjain ha JN Stadium, Shillong por 5:30 PM. Ka Shillong Lajong kala wanphai hadien ba ka la dep ban iakhun lai tylli ki jingialehkai nabar na la iing kynthup ka jingiakhun ia ka Churchill Brothers, Neroca FC bad ka Gokulam Kerala. Na kine ki lai sien ialehkai, ka Lajong ka la ioh ban khur tang lai point na ka jingialehkai pyrshah ia ka Neroca FC, Manipur hynrei ar tylli ka la shah rem.
Ka jingiakhun jong ka Mohun Bagan kaba la dep shen ka la iakhaid 1-1 pyrshah ia ka Aizawl FC ha kane ka taiew ba la dep. Ha ka jingialehkai ba la dep, ka Shillong Lajong bad ka Mohun Bagan ki la iakhaid 1-1 kaba long ha ka 14 tarik Nohprah ha Kolkata hynrei ha kane ka jingiakhun ban long ha kane ka nongbah, kan long kaba jwat ia baroh ar tylli ki kynhun ba la don kham slem ha kane ka lympung bad kan long kaba eh ban ong mano ba kham khlaiñ. Haduh mynta ka Shillong Lajong ka don ha ka kyrdan basan da kaba kamai 17 point katba ka Mohun Bagan ka don ha ka kyrdan basaw da kaba kamai 17 point hi. Na ka bynta kane ka jingialehkai ban long ha ka sngi Saitjain, ki paidbah nongpeitkai ki lah ban thied ia ka tiket na Mobile Centre Khyndai Lad, Sports Spirit MUDA Complex bad SSA Counter ha Polo. |
