La sngi Nyngkong hukum ka Kashari ia u CEM ban leit hajir r“Um dei shuh ban kren eiei sha ki lad pathai khubor”

Shillong, 13 Jymmang:
Ka Division Bench ka Meghalaya High Court ka la hukum ia u Chief Executive Member (CE M) ka KHADC u Bah Adelbert Nongrum ba u dei ban leit hajir hi dalade la sngi Nyngkong halor ka mukotduma ba la rejis ter ia u namar ka jingkren pyrshah ia ka rai ka Kashari.
Ha ka jingbishar hynne ka sngi ka kynhun nongbishar ba kynthup ia u Chief Justice u Uma Singh bad u justice TN Singh ki la pynmih ia ka hukum ba u CEM u dei ban wan hajir hi dalade ha Kashari ha ka sngi Nyng kong bad la bthah ia u Superintendent of Police ka East Khasi Hills ba un pynpoi ia ka jingthoh sha u CEM. Haba kren hadien ba la mih na Kashari u nongiasain ain u CEM u Bah GS Massar u la ong ba ka Kashari ka la bthah ia u CEM ba un leit hajir dalade ha Kashari la sngi Nyngkong ban pynlong biang ia ka jingbishar. Ha kajuh ka por, ka Kashari ka la bthah ba u CEM um dei shuh ban kren eiei sha ki lad pathai khubor kynthup ki kot khubor bad ki channel.
Lah ban kdew ba u Bah Nongrum u la shah pynngat mukotduma ha ka Kashari hadien ba u la kren pyrshah ia ka rai jongka halor ki rangbah shnong ha u bnai Nohprah mynshem snem kaba la mih ha ki lad pathai khubor.   Ka Kashari ka la tian bishar ia u CEM ka KHADC hadien ba la pynmih ia ka jingkren pyrshah ia ka rai jongka bad ka jingbishar ka dang iaid haduh kine ki sngi.
La sngi Nyngkong kaban wan, ka Kashari kan sa ai ia ka rai jongka halor kane ka kam.