Shillong: U Working President ka UDP u Bah Paul Lyngdoh mynta ka sngi, u la rah ki kot ki sla sha u chairman ka High Level Committee (HLC) u Bah Prestone Tynsong na ka bynta ka jingdonkam ban pynkynriah ia ki kharmetor na them Iewmawlong.
U Bah Paul Lyngdoh, haba leit rah ia ka dorkhas sha U bah Prestone Tynsong, myntri rangbah ba ar, ka sorkar Jylla, ha ka Sngi Balang:Wlytan
Haba kren sha ki nongthoh khubor hadien ba la iakynduh ia u Symbud Myntri Rangbah, u Bah Paul Lyngdoh uba long teng u myntri sorkar, u la ong ba ka jaka them Iewmawlong ka dei ka jaka jong ka Municipal bad jong ka Hima Mylliem bad ki kharmetor kim don bynta eiei halor kane.
“Lada don ka jingiakajia ia ka jaka ka puta ka dei tang hapdeng ka Hima Mylliem bad ka Shillong Municipal Board ba kin iapynbeit, bad kam donkam ban tuklar ki kharmetor kiba shu ai ban sah shipor katba ki dang trei ha ka Municipal”, la ong u Bah Paul Lyngdoh.
Katkum ka jingong u Bah Paul Lyngdoh, ka jaka ha them Iewmawlong ka heh kumba 34,000 sq ft ka dei jong ka Municipal kaba shu ai jaka sah ia ki kharmetor.
“Ki kharmetor kim lah ban kam trai ia ka jaka namar ba ki dei tang ki nongtrei ka Board ba shu phah shong tang kum ki nongtrei bad ki hap ban mih hadien ba la kut ka por, ka juh thik kumba la long ia ka jaka sah u Myntri Rangbah uba sah ha iing sorkar. Ia ki kharmetor la shu wanrah ha ka por phareng bad kam mut ba ki dei trai ia ki jaka tangba la ai ban sah”, la ong u Bah Paul.
U la ong ba ha ki snem 2005-06 por ba u long myntri sorkar ia ka tnad sor, la thmu ban pynkynriah ia ki kharmetor hadien ba ka sorkar ka la thmu ban shna ia ka surok suin ha kaba la shim ruh ia ki jaka jong ki katto katne ki bynta ba hap ha ki riew shimet kum ha bynta ba don ha High Court, ban shna ruh ia ka multi level building ha them Iewmawlong ba sah ki kharmetor, hynrei kane ka kam, ka la suki noh na ka jingtuklar ka bor na Delhi bad ka jingkiew kashari ki briew kiba sah ha them Iewmawlong.
“Ka la nang pynjyrwit ia ka kam hadien ba la tuklar ka bor nawei bad ka jingkiew kashari ki kharmetor”, u la ong.
Halor ka jingkynnoh ia u ba um leh eiei ha ka por ba u don ha ka bor, u Bah Paul u la ong, “Ki don ki briew ki bym tip bad don ki bym kwah ban tip ia kaba la leh ruh”.
U la ong ba ka jingwan ki briew nabar ka jylla sha them Iewmawlong, ka long kumba ai ding shuh shuh namar ba kane ka kam dei ka jingiakhih pyrshah jaitbynriew hynrei ka dei kam kaba iadei bad ka jinglong trai ia ka jaka.
Ha kajuh ka por, u la ong ba ka jingwan jong ki briew nabar ka long ba ki shim kabu lyngba ka jingialam bakla ki lad pathai khubor ka ri.
“Ngam don jingartatien ba ka sorkar kan lah ban pynbeit ia kane ka kam kharmetor kumba la kwah u paidbah”, la ong u nongialam ka UDP.