La shem taiew yn jubab ka KHADC, ia ka ain Rangbah Shnong

Shillong, 30 K’lyngkot:
Ka Khasi Hills Autonomous District Council (KHADC) ka la pynkhreh ia ka jubab ban phah sha ka sorkar jylla halor ka jingpynphai kylla biang jong ka sorkar jylla ia ka Bill halor ki Rang bah Shnong kaba la tip kum ka “The Khasi Hills Autonomous District (Village Administration) Bill, 2014.
Katkum ka khubor ba la ioh lum mynta ka sngi la iathuh ka District Council kan phah ia kane ka jubab ha kane ka taiew ban wan bad hadien kane kin sa leit buddien na ka bynta ban dawa na ka sorkar jylla ba kan pynsted ban phah ia kane ka bills ha u Lat ka jylla bad kumjuh ruh ban ioh noh ia ka jingmynjur.
Hadien ba ka KHADC ka la pynkhreh ia kane ka Bills bad phah sha ka sokar jylla ka la khmih lynti ba kane ka ain kan ioh ia ka jingmynjur, hynrei ka sorkar jylla kam shym la phah satia sha u lat, hynrei ka la pynphai kylla sha ka District Council halor ka nongrim ba ym shym la pynpaw satia ia ka rukom bad ki kyndon ban thaw ia ki Dorbar Shnong bad ki mat kiba iadei bad ka synshar paidbah.
La kdew ruh da ka sorkar ba kat kum kane ka bills ka jingdon ki Dorbar Shnong ka iatakhuh bad ki long duplicate jong ka sorkar jylla bad ki iatakhuh ruh bad ki ain kiba la don lypa jong ka District Council.
Lah ban kdew hangne ba na ka liang jong ki Rangbah Shnong ki la don ha ka umdum bad ki la syier na ka bynta ban ai ia kino kino ki certificate hadien ba ka Iingbishar ka la kdiah noh ia ka bor bad ka itkiar jong ki Rangbah Shnong halor ka nongrim ba kim shym la treikam satia lyngba ka jingithuh da ka ain, hynrei ba la shu leh be-ain. Hadien ba la ioh ia ka jingmynjur jong u lat halor katei ka Bills na ka liang jong ki Rangbah shnong kin treikam katkum katei ka ain ba la pynkhreh da ka District Council.