La shah ban sdang khaii sha Garo hills, balei sha Khasi Hills? Kylli ka MIECC, na U MR

Shillong:Ka Meghalaya International Exporters Chamber of Commerce (MIECC), ka la buh ia ka jingkyrpad na u Myntri rangbah u Conrad K Sangma ban ai noh ia ka hukum halor ban sdang noh ia ka international trade ha ki thain jong ka Khasi bad Jaintia Hills.

Ha ka dorkhas kaba ki la phah ha ophis trei kam jong u myntri rangbah, ha ka sngi balang, ka MIECC ka la ong ba “Ngi kyrpad ia u Myntri rangbah ba un pynmih ia ka hukum ban phah sdang noh mardor ia ka International trade ha Khasi bad Jaintia Hills hapdeng ka Ri India bad Bangladesh.”

Katei ka seng, ka la pynpaw ia ka jingsngewkhia halor ka jingpynslem jong ka sorkar jylla ban shim ia kano kano ka rai halor kane ka bynta wat ka la don bun ki ba la kyrpat ban sdang noh ia ka international trade ka ba dei na Dawki bad na kiwei ki jaka khappud jong ka Khasi bad Jaintia. Ki la pynpaw ruh ba ki briew jong ki ar tylli ki District ki la kynduh shibun ki jingeh hadien ba ki la shah ktah ki la kamai kajih. Ka MIECC ka la bteng ruh da ka ba ong ba katba ia ka international trade ha Garo Hills la dep ban phah sdang.

“Ka sorkar ka la pheil ban weng ia ki jingeh jong ki briew na khasi Jaintia katba na ka bynta ki briew na Garo Hills la shah ba kin sdang pyntrei biang ia ki kam kamai kajih ha ka ba iadei bad ka international trade hapdeng ka India bad Bangladesh” ong ka kyrwoh.

Ka MIECC ka la dawa ba lada ka jingpynsangeh trei kam jong ka international trade ha Garo Hills ka lah ban weng, ka sorkar ha ka juh ka rukom ka dei ban pyntrei kam lang na ka bynta ki District jong ka Khasi bad Jaintia Hills.