La shah ban iathoh

Bah RM Shabong

Ban iathoh (lehse) kam long ban leh online, hynrei lada ka long, lehse ka sorkar Jylla, kan jin da la ai da kiwei pat ki phormula bad lah sngewkmen hi malu mala, haba la shah nangne shakhmat ban iathoh, wat la yn shah tang ia ki 50ngut kiba leit ban pyn shngain ia ki nong iathoh. Ha ka jingshisha, ka jing iathoh, kam donkam satia shibun ki briew, namar kiba donkam, ki dei kito ki nong pyniaid lane ki nong ialam niam, lada dei ki sadhu/ki pastor/ ki phadar/ ki tymmen basan bad sa arngut kiba dei ban pyndep ia ka soskular ka jingieid jongki.

Katei ka hukum ka sorkar, khlem pep, kan pynduna ruh shi katdei ia ka lut ka sep, ha ka por iathoh, wat la kan nym ktah pat ia ka tynrai jong ka jingmut jong ka jingiateh jingieid jong ki arngut bad katei ka kyndon, ka la plie lad shi katdei ia kito kiba donkam eh. Kam dei tang katta, ha kine ki sngi, la iohi ia ka hukum jong ka sorkar, ba ka pyrkhing bha ruh, halor ka jingleit iap briew bad katei ruh, ka dei sa kawei pat ka bynta, kaba i iahap shibun, namar ba kiba donkam ki long tang da ki phew ngut, kiba leit tep briew sha lum.

Ym tang katta, la khang ruh ban buh slem ha iing ia kiba iap bad don ruh kiba la pynbor ban tep noh ha kajuh ka sngi, ba ki khlad bad katei ruh, ka la iarap shibun, khamtam ia ki duk ki raitoi, ha kane ka por hiran ban pynlut ia ka bai sha bai dud bad sa ka baibam bai dih, kaba la ju long sa kawei pat ka kam lutksan kaba jur bha ha ka rukom khasi jongngi. Don bun ki ban pyrshah, ia ka jing pyniaid ka sorkar Jylla, hynrei, ngi iohi ba ka por ka dawa, ba dei ban shong tang arngut ha kawei ka taksi, lane shong tang 4 ngut ha kawei ka sumo bad kumta ruh, hap leh lang ha ki jing iathoh bad ki jing iap briew ruh de, katba kum ka ain jong ka sorkar India.

Ki don kiba sngew pyrshah ia ki ain jong ka sorkar, halor ka deng mask lane ka ia shong jngai; hynrei ha ka jing shisha, kam dei satia ban da pynbor ia ki paidbah bad lada ngin jin da la sngewthuh ban long kiba husiar lane kiba adkar, kumta khlem pep, kan jin da long kaba iarap shibun ia ki ain sorkar, ba kin trei kam, namar ba kane ka dei ka ain kaba iadei bad ka koit ka khiah bad kam dei satia kaba ktah ia ka riti dustur, lane ka synshar khadar bad lada ngi sngewthuh ban sumar dalade, ka ju wan ka kyntien, kaba ong ba ka jing iada ka kham donkam ban ia kaba dih dawai.