Shillong:Ka Shillong Sports Association, ha ryngkat ki nongialam jong ka OC Blue Shillong Premiere League, ki lah pynbna myn ha kane ka sngi saitjain ba ka second leg jong ka League yn ioh ban sdang noh naduh ka tarik kaba 3 jong u Nailar ha kaba ka match kaba nyngkong kan long hapdeng ka Shillong Lajong FC pyrshah ia ka runner-up jong u snem 2019 ka Rangdajied United FC.
Katkum ka jing pynbeit, ka first leg jong kane ka League kan kut ha ka 27 tarik Naitung, ha kaba la iohi ba ka Mawlai SC ka dei ka kynhun kaba lah ialehkai bha ha kane ka first leg bad la thikna ruh ba kan pyndep ia ka kylla kaba nyngkong jong kane ka League kum ka kynhun kaba hakhmat duh jong ka miej iakhein poin. Ha kaba iadei bad ki kynhun kiba shadien, kane ka shi taiew ka long ka lad ia ki ba kin pynkhreh bha lada ki kwah ban knieh ia ki kyr dan kiba shakhmat.
Ka jaka ialeh jong ka second leg kan hi long hajuh, kata ka MFA Turf ha Third Ground Polo bad ki por ialehkai kin sdang naduh ka 4 baje janmiet kaba yn neh haduh ka 27 tarik Nailar. Naduh ka 1 tarik u Nailur pat ka por ialeh kan long noh naduh ka 3:45 jan miet.
Yn pynkut noh pat ia ka OC Blue SPL 2021-22 ha ka 24 tarik Nailur da ka jingialeh kaba khatduh hapdeng ka Langsning FC pyrshah ia ka Mawlai. Ia mynta ka Langsning ka ieng ha ka kyrdan kaba ar.
Katkum ki jing pynbeit ba la wanrah na duh u snem 2019, la rai ba kan ym don knockouts lane ka final, hynrei ki club kiba lah ban wan shakhmat ha ka miej iakhein poin yn pynkup burom ia kata ka club kum ka lahduh ha kane ka samoi ialeh jong ka OC Blue SPL.
Phi don ban ong eiei?