LA SDANG BIANG KA DRAMA BAITYNNAT HA DISTRICT COUNCIL

Kumba ka la jia ia ka song peisa Special Plan Assistance (SPA) kaba T.133 klur, ha kane ka kynti ruh ka song peisa Special Plan Assistance kaba T.52 klur ka long ka daw bah jong ka drama huri hura ha Khasi Hills Autonomous District Council. Kane ka drama ka long ba 6 ngut ki MDC na ka liang synshar United Democratic Alliance (UDA) ki la mih noh na ka hadien ba ki la ai ka shithi. La bunsien kine ki MDC ki la ai jingmut ia u CEM, Teinwell Dkhar, ba u dei ban iasam ia kane ka song peisa mar katjuh hapdeng ki MDC. Wat ki MDC na ka liang pyrshah, Ka Congress ruh, ka la dawa ia u CEM ban leh kumta, hynrei um man sngap satia.

Katkum ka jingtip ba la ioh ki MDC kiba don ha ka liang synshar ki ioh mar mar T.80 lakh uwei uwei, katba ia kiba don ha ka liang pyrshah (Congress) mar mar T.50 lakh. Kane ka mut ba na ka T.52 klur u CEM u la sam tang T.20.20 klur. Un leh kumno ia ka peisa kaba dang sah ka ba long T.31.80 klur?. Katkum ka jingiathuh jong ki MDC kiba la mih na ka UDA ki la iai ai jingmut ia u CEM ba un khot ia ka jingialang jong ka UDA bad ban pynshai bha halor kane ka peisa kaba T.52 klur, un leh kumno, un pyndonkam kumno bad un iasam kumno? Hynrei ki la kynnoh ba u la shu sngap mynthi bad um shym la leh ia kata kaba ki ai jingmut ha u. Kane ka la buh ia ki MDC ha ka umdum bad kumta ka sa mih kane ka drama. Hadien kane u CEM u la khot ia ka jingialang jong ka UDA ha ka 1 tarik u Jymmang hynrei kine ki MDC kiba la mih noh na ka UDA bad sa kumba lai ngut kiwei pat ruh kim shym la poi sha kane ka jingkhot iakren jong u CEM. La ioh jingtip ba u la khot biang ia ka jingialang jong ka UDA ha ka 2 tarik ban iakren bad ban iapynbeit ne iashai halor kane ka kynrum kynram kaba mih na ka songT.52 klur.

Ha ka jingshisha kan don jingeh aiu ban iasam ia kane ka song peisa kaba T.52 klur namar kam da dei kaba bun. Hynrei kumba lah ban sngewthuh  u CEM u la mang ruh ia ka peisa ban pynlut sa ha ki katto katne ki skhim bad ki project jong ka KHADC kiba la sahkut khongreng naduh ki por ba long CEM u Bah P.N Syiem bad ka jingthmu ban pynngam ia ka peisa halor kine ruh ka long kaba bun, bad ym dap peisa shuh ban dang iasam shuh shuh sha ki skhim MDC. Ka don shibun ka jyrwit jyrwat hangne. Ha ka jingshisha ia kane ka T.52 klur la dei ban sam kham bun sha ki MDC na ka bynta ki skhim jong ki bad lada dang tam sa peit kumno ban leh na ka bynta kita ki projek kiba la shu sah khongreng naduh mynshuwa ba la sdang da kiwei ki CEM barim. Ka jingleh jong ki CEM barim lane jong ka E.C bamynshuwa ym dei ban pynbah lyngkor ha u CEM bad ka E.C bamynta. Ym dei ban shim ia kino kino ki skhim lane ki project khlem don lypa ka peisa ha kti bad ia kita dei ban pyndep mardor, ym ban pynkit ia ka lyngkor ha ki CEM bad E.C ki ban wan hadien. Imat ia ka tngit bad ka synrum barim jong ka 133 klur la pynbit thit bad kane ka 52 klur kaba mynta. Bad sa kawei pat, balei ka EC kaba mynta hapoh ka jingialam jong u CEM ka sngap bad shah ialam ha kita ki Businessmen lane ki Contractor jong ka KHADC kumba la kynnoh da ki MDC kiba la phoi.

Kane ka kam kaba la sah ha ka umdum mynta ha KHADC ka dawa kyrkieh ia ka jingpynbeit bad ym dei ban ialeh kyllain ia  52 klur tyngka. Shisha ka donkam ia ka jinglehkhuid lehsuba (transparency) halor rukom iasam ia ka peisa hapdeng ki MDC bad ba kam dei ban don ka jingleh shiliang iano iano ruh. Ki paidbah ruh ki kwah ban iohi ia ka jingkhuid jingsuba, ym ban shu iabamsap ne ban leh kyllain jalbi tang ban pyniohnong ne pynhun iano iano shimet. U CEM Teinwell Dkhar, un jin da ioh burom na ki paidbah babun jin da u lah ban pynkhuid noh ia ka kynrum kynram kaba don mynta ha ka Council da kaba iasam marbiang ia ka peisa hapdeng ki MDC, kiba don ha ka liang synshar bad kiba don ha ka liang pyrshah.