La pyrshang ban iatylli hapdeng ki seng riewlum, hynrei kam poi shano shano, ong U Bah Metbah

Shillong:Hadien ba la pynkha thymmai ia ka seng saiñ pyrthei ha ka jylla Meghalaya ba la thaw da u MLA barim jong ka Hill State People’s Democratic Party(HSPDP) na Nongkrem Constituency kata u Bah Ardent Miller Basaiawmoit ha ryngkat bad ki riewshemphang, na ka liang jong u Bah Metbah Lyngdoh u ba dei u President jong ka seng United Democratic Party(UDP) bad u ba dei ruh u lamphang jong ka ïing dorbar thawaiñ ka jylla u la ong ba ka UDP kam kwah ban ong eiei halor ka jingmih thymmai jong katei ka seng ha ka jylla ha kaba u la ong ruh ba ka seng UDP kam kwah satia ban tuklar eiei halor ka kam seng jong kiwei, namar kata ka shong ha ka jingkwah jong ki hi bad ka shong beit ha ka jingsngew jong ki paidbah ba kano ka seng kaba biang ha ki namar ba ki paidbah ki tip kham bha.

Haba kren sha ki lad pathai khubor ha ka 6 tarik u bnai Risaw 2021, u Bah Metbah Lyngdoh u la ong ba um ong ba ka seng UDP ka biang hynrei kumba u iohi hi mynta ki paidbah ki kham phai khmat bha sha ka UDP napdeng ki seng riewlum baroh. Shuh shuh u Bah Metbah Lyngdoh u la ong ruh ba ha ki por kiba mynshwa, ka seng UDP ka la pyrshang katba lah ban pyndon ka jingiatylli ia baroh ki seng riewlum hynrei kata ka jingthmu kam poi satia shano shano ruh bad wat la ka la jia kumta, hynrei ka seng UDP kan nym sangeh satia ban wanrah ia ka jingiatylli hynrei ka seng UDP kan dang iai pyrshang hi pat ban wanrah ia ka jingiatylli hapdeng ki seng riewlum baroh.