La pynskhem ia ka HFU West Jaintia Hill

Jowai: Ia ki nongkitkam ba pura jong ka seng nongrep Hill Farmers Union (HFU), West Jaintia Hill District la ioh ban pynskhem pura da u President jong ka seng kmie u bah Commander Shangpliang ha Jowai.

Na ka liang jong ki nongrep kiba la wan iashim bynta ha kane ka jingialang ki la pynpaw ia ka jingsngewkmen ban ioh ia ka seng ki nongrep khnang ba kin lah ban pynsngew ia ki jingeh jong ki sha ka sorkar.
Na ka liang jong ki nongrep ki la pynpaw ia kiba bun ki jingeh kata ha kaba iadei bad ki symbai, ka irrigation (um), ka insurance ia ki mar rep, u surok, ka dor ka mur bad kumjuh ruh halor ka jingot kilo be-ain ia ki mar rep bad kiwei kiwei de.
Haba kren ha kane ka sngi pynskhem ia ki nongkitkam u bah Commander Shangpliang u la iathuh ba ia kitei ki jingeh na ka liang jong ka seng ka la dep iakren bad la dep phah ruh ia ka dorkhas sha ka sorkar jylla.
“Wat ap ba kiwei kin iakren na ka bynta ki jingeh jongngi ki nongrep, iakhun hi dalade kiwei ki lah ban kren tang da ka ktien ba ki sngewkhia iangi ki nongrep bad ki lah ruh ban ong ba ngi dei u budlum ka ri bad ka jaitbynriew, hynrei ha ki kam te em” ong u bah Shangpliang.
U la ong ba ka seng ka thmu ban pynrung dkhot kumba 1 lak ngut hapoh ka seng bad mynta ki nongrep ki la poi palat 40 hajar ngut, hynrei tang katne kam pat biang u la ong. U la ong ruh ba ynda ki nongrep ki la iatylli kawei, ym don kano kano ka jingeh kaba ym lah ban pynbeit.
U la kitbok kitrwiang ruh ia ki nongkitkam ka West Jaintia Hill bad u la ong ba kum ki nongialam ngim dei ban sngewsyier haba ngi treikam namar u Blei u la ai iangi ki briew ka jingshemphang wat la ngi duna ha ki jingpule kum ki nongrep.
Ki nongkitkam jong ka West Jaintia Hill ki kynthup ia u President bah Kerlang Shylla President Bah Treilang Bareh General Secretary bah Marbiang Phyllei adviser bah Moses Suting Vice President bah Heibormi Lyngdoh Assistant Secretary Bah Michel Kyndait Finance Bah Pillarson Phawa executive member. La rai ruh ban pynrung shuh ia ki Executive Member ia ki President lane Secretary jong ki Unit bapher bapher.