La pynmih ia ka kot The Federation of Khasi States – History-Epistemology and Politics

Kane ka kot ka dei ka jingpyrshang ban lum thup ia ka history jong ka jaidbynriew Khasi kaba ngi la pyrshang ban lum bad thoh ha ryngkat u Professor Bodhi Sainkupar Ranee, (uba hikai ha Tata Institute of Social Science Mumbai) bad ngi pynpaw ka jingsngewnguh ia u Prof. Ranee uba la pyndep Phd ha ka phang “The Federation of Khasi States” kaba la pynlong ia ngi ban pynmih bad thoh lang ia kane ka kot “The Federation of Khasi States – History-Epistemology and Politics” kaba nyngkong (First Edition) kaba dei halor ka lynti iaid ka jingiakhun ki Hima Khasi naduh 1773 (first sylhet records) ter ter shaduh ki snem 1835 ter ter haduh 2017.. ngi la pynbeit ruh ban thoh ia kane ka kot hapoh ka shatri jong ka kynhun Tribal Intellectual Collective India (www.ticijournals.org) ka kynhun riewlum ka ri india bad ha kaba la ioh ki kyntien maitphang na uwei na ki riewstad uba la paw bha u Professor Virginius Xaxa, bad kane ka kynhun bad kane ka kot jingthoh kaba nyngkong ka la ioh lad ban pynrung lang ha ki thup (journal) ki skul bah jingpule (University) ha kylleng ka pyrthei.

La thoh bniah ia kane khnang ba kiba bun ki samla pule ha ki University na ka jylla, na Ri India bad kiba na shiliang duriaw kiba na bar Ri India ki wan sha ngi na ka por sha ka por ban wad jingshai ban batai katba ngi sngewthuh ia ka thymmei ka jaidbynriew khasi, ka synshar Khadar bad ka bishar. Kane ka kot ngi kyrmen kan pynsuk ia ki riewpule, ki nongmihkhmat, ki bor sorkar, ki Seng bhalang, ki skul pule, ban nang kham shai halor kane ka phang.

Kane ka kot ka shim ia ka bynta katba lah ban buddien ia ka jingiaid lynti ka jingiakhun ki hima khasi naduh ki snem 1773 da kaba sot na ki kot (First Sylhet Records 1773) shwa ka jingwan ki phareng, ka por phareng ka jinghiar thma ki phareng, ka por laitluid ki hima khasi, Ka Federation of Khasi States, Ka synjuk lang ki Hima Khasi, ka constituent assembly, ka jingiakut standstill, ka lyntih jong ka IOA & AA, Ka khasi states constitution making dorbar, ka jingbsuh jubor ia ki hima khasi hapoh ka First Schedule, sixth Scheduled, Constitution Ri India ha ki por synshar Assam naduh ka 26 January 1950 ter ter ka jingiakhih Hill States, haduh ban da wan ka jylla Meghalaya bad ki jingbteng ki jingiakhun ka jaidbynriew Khasi haduh kine ki sngi 2017. La thoh khnang da ka phareng ban pynshai sha ka pyrthei halor ka jingiaid lynti ki jingiakhun ka FKS.

Kane ka kot kaba nyngkong (First Edition) ia mynta lah ban pule kum ka eBook /bad lah ban download/shon(print) khlem jingsiew bad namar ka khlam covid19 kan dang slem ban ioh ia kane ka kot kum ka “hardcopy”.

Lehse ha ka Second Edition kaba ngi dang thoh mynta kaban kynthup ka jingiaidlynti ka jingiakhun ka FKS haduh u snem 2021 kaba ngi dang thoh kaba yn sa pynmih ha u snem 2022 ngin sa pynmih lang da ka “hardcopy” ha kaba ki paidbah kin lah ban ioh online.

Kyrmen kine ki jinglum thup ia ki kot ki sla ki sakhi satar kin long ka jingmyntoi ia ka pateng mynta bad longdien kiban sa nang wan.

Ai khublei ia phi khamtam ki nongthoh khubor kiba la kyrshan katba lah ha ka lynti jong ka jingiaid ka jingiakhun ka Federation of Khasi States ha kaba kyrshan ban pynmih ia ki jingthoh kiba la bun mynta la bun bun snem.

Bah John F Kharshiing,
Adviser & Spokesperson, Federation of Khasi States.