La pynkut noh ia ka lympung ialehkai Badminton ka BSA ha Byrnihat

Nongpoh: Ka lympung ialeh kai Badminton kaba la pynlong da ka Byrnihat Sports Association ha Moonlight Indoor Stadium, ka la poi sha kaba kut noh hynnin ka sngi miet sngi Saitjain.

Ha kaba kut jong katei ka lympung ialehkai Badminton, la sakhi da ka jingdon u Bah Victor Rani, MDC Jirang kum u kongsan, ha ryngkat kiwei de ki nongialam shnong bad ki riew rangbah katei ka thain.

Khyndiat halor katei ka lympung ialehkai Badminton, ki la don shibun ki samla kynthei shynrang bad ki riew rangbah ki la leit ban iashimbynta.
Na ka bynta ban pyni ia la ka jong ka sap ha ka jingialehkai Badminton bad kito kiba kham tbit ki la poi sha ka thup jong ka phainal.

Ki la don shibun ki bynta hapoh katei ka jingialehkai, kata ha ka Women’s Single, Veteran Single, Veteran Doubles, Mens Single Senior bad Mens Double Senior bad kitei kiba la poi sha ka jingjop bad shah rem ha ka phainal, ki la ioh da ki Trophy lem bad ka pisa.

Ia ka nam lahduh ha ka Mens Doubles Senior, la rah da u Bah Sosthenes Sohtun bad u Babit L Mawlong, katba u Franky L Nongbri bad u Pynsuk Synrem ki la wan ha ka kyrdan ba-ar.
Ha ka Mens Single Senior, u Enrique Nongrum kum u nongjop hadien ba u la pynliem ia u Phrangsngi L Nongbri.

Ha ka Veteran single, u Jeslin Syngkli u la pynliem noh ia u Bah Sosthenes Sohtun, katba ha ka Veteran doubles, u Jeslin Syngkli bad u Lil Chetri, ki la pynliem noh ia ka kynhun u Rodrick Nongrum bad Lewis Kylla, ha ka Womens single ka Elisha N Lyngdoh ka la pynliem ia ka Lina N Lyngdoh.