Shillong: Ka Meghalaya Board Of School Education(MBOSE) ka la pynkhreh ban pynlong ia ka eksamin jong ka Secondary School Leaving Certificate(SSLC) bad Higher Secondary School Leaving Certificate(HSSLC) ha kaba palat 1 lak ngut ki khynnah kin iakhun ia kane ka eksamin mynta u snem. Ka eksamin SSLC kan sdang naduh ka 19 tarik u Iaiong 2021 bad kan kut haduh ka 3 tarik u Jymmang 2021 bad ka HSSLC pat kan sdang naduh ka 16 tarik u Iaiong 2021 bad kan kut pat haduh ka 12 tarik u Jymmang 2021.
Ki khynnah pule ki ban iakhun ha ka eksamin SSLC kin don kumba 78 hajar ngut eiei ki khynnah ha kumba 144 tylli ki jaka thoh eksam (Centre). Na kitei ki 144 tylli ki jaka thoh eksam kumba 84 tylli kin don ha Ri Lum Khasi bad Jaintia bad 60 tylli ha Ri Lum Garo.
Haba phai pat sha ka HSSLC, kin don kumba 40 hajar ngut eiei ki khynnah pule ki ban iakhun ia kane ka eksamin kiba kynthup ia ki khynnah na ka Science Stream, Arts Stream, Commerce Stream bad Vocational Stream. Kin don kumba 104 tylli ki jaka thoh eksam(Centre) ha kaba 65 tylli ha Ri Lum Khasi bad Jaintia bad 39 tylli ha Ri Lum Garo.
Ban ia kaba ianujor ha kine ki snem kiba la leit dang kham kiew ki khynnah mynta u snem ki ban iakhun ia kine ki eksamin namar ba khlem shim la don ka selection test ka ban jied ia ki khynnah. Ka Sorkar Jylla kum ban shu pynkynmaw ka la shim ia ka rai ban khate noh 30 % na ka syllabus jong ki khynnah SSLC bad HSSLC namar ba ki skul ki khlem shym la ioh pynlong skul naduh ba wan lynshop u Covid 19 bad ki la hap ban shim da ki online class ha kaba la buh jingeh bha ia ki khynnah bad ia ki nonghikai ban sngewthuh bad ban batai ia ki lynnong.
Phi don ban ong eiei?