La pynduh noh ia ka por shongthait ba 2 kynta ki Muslim ha iing dorbar

Guwahati: Ka dorbar jylla jong ka Assam, ha ka sngi Palei (30 tarik u Nailar, 2024) ka la weng noh ïa ka kyndon ban shongthait ar kynta ïa ki MLA Muslim ban ai “Jumma Namaz”(jingduwai sngi thohdieng).
Da kane, mynta yn nym ai por ban shongthait ha ki sngi thohdieng ia ki nongthaw ain Muslim ban pyndep ia ki jingduwai.

U Myntri Rangbah ka Assam u Himanta Biswa Sarma haba iaroh ia kane ka rai u la pynpaw ia ka jingsngewnguh ia u Speaker jong ka iing dorbar Assam u Biswajit Daimary.
Da kaba khot ia kane ka rai kum “ka histori”, u Myntri Rangbah ka Jylla u la ong ba ka iing dorbar Assam ka la buh hakhmat eh ia ka jingmih bad kumta ka la pynmih sa kawei pat ka “jingsah” jong ka jingsynshar phareng.

“Da kaba pynduh noh ïa ka jingsangeh Jumma kaba 2 kynta, ka Assam Assembly ka la buh hakhmat eh ïa ka jingmih bad ka la bret sa kawei pat ka dak jong ki jingkit jingbah jong ki nongsynshar phareng. Ia kane ka jingleh la wanrah da u Syed Saadulla jong ka Muslim League ha u snem 1937. Ka jingsngewnguh jong nga ia u hon’ble Speaker u Shri Biswajit Daimary bad ki nongthaw ain jong ngi na ka bynta kane ka rai kaba don histori,” la thoh u CM Sarma ha ka microblogging site X.

Ka jingpynsangeh ïa ka kyndon shongthait ar kynta “Jumma Namaz” ha ki sngi thohdieng ha ka Assam Assembly ka dei ka rai kaba la shim da kawei ka rai da ka committee jong ka Assembly rules kaba la khlieh da u Speaker u Biswajit Daimary kumta la pynkut noh ïa ka rukom pynjahthait hapdeng ka por 11baje mynstep haduh ka por 1baje nohsngi.