“La pyndam noh ia ki pop!”

AIS Suja

La pyndam noh ia ka pop da ka jingshah u Jisu Khrist halor ka diengphna. Ka jingshah halor diengphna dei ka jingshah knia (sacrifice) na ka bynta ki pop baroh bad u Jisu u dei u langknia u o langbrot jong u Blei. Dei tad haduh ka jingwan longbriew u Jisu sha kane ka pyrthei ula pyndam noh ia ki pop, ula wan ban kit ia ki pop ka pyrthei. “Ha khmih u khun langbrot jong u Blei, uba kit noh ia ki pop jong ka pyrthei” Ioannis 1:29.
Naduh ba ka pop ka la rung ha ka kper Eden haduh shwa ka Testament kaba thymmai, u soitan u la teh la khum ia ka pyrthei, kat haduh ba la kha ia u Jisu sha pyrthei, ka pyrthei ka dang shah teh shah khum ha ki bor ka jingdum, bad hapoh ka Hukum bad ki ain u Moses ban lynthem maw haban da iap khlem jingisynei. Hynrei tad ynda u Jisu u la kiew halor diengphna, u la siew dep ia ka ram ka pop na u soitan, bad u ong- “La pyndep” Ioannis 19:30. U Jisu u la siew ia ka ram ka pop na u soitan da ka snam jong u hi ha lum Kalbari.
Mynta, ka jingong u Ioannis – “Ha khmih u khun langbrot jong u Blei uba kit noh ia ka pop ka pyrthei” la pyndep ha lum Kalbari.
Balei u Jisu u hap ban shah iap da lade na ka bynta ka pop ki briew? Dei namar ba u Blei u la ieit katta katta ia ka pyrthei”. Ioannis 3:16. Ka daw hi ka long, ba ka snam ki mrad kam lah shuh ban sait ia ki pop kiba khia jong u briew kum ha ki por mynshuwa jong ka Testament Barim. Ka snam ki mrad kim lah ban pynhun ia u Blei da kita ki jingknia – “Lymne da ka snam ki blang bad ki khun masi, hynrei da ka snam JONG U HI, U la leit rung tang shisien sha kata ka jaka kyntang haba u la ioh ia ka jingsiew spah bymjukut. Hebru 9:12. Kumta ka jingknia kaba da u Jisu Khrist ka pyndam noh ia ka pop. Ka jingknia kaba da u Jisu ym donkam shuh ban leh bunsien kumba u Rangbah Lyngdoh u leit rung sha kata ka jaka kyntang man ka snem, kata ruh ym da la ka jong ka snam” Hebru 9:25.
Hynrei mynta tang shisien, la pynpaw ia u haduh kaba kut ki ia, ia ka ban pyndam noh ia ka pop da kaba u knia ialade”. Hebru 9:26. Kumba la buh ia ki briew ban iap tang shisien, hadien kane kan wan ka jingbishar Hebru 9:27. Kumta ia u Jisu Khrist ruh haba la knia ainguh ia u tang shisien ia ka ban bah ia ki pop kiba bun, un wan mihpaw pat ha kaba arsien khem bah pop shuh” Hebru 9:28. Ka mut ba u Jisu u la long u langknia uba tang shisien, ym bunsien ia kaba ban bah ia ka pop ki briew, hadien kane u la mihpat bad u la kiew sha bneng sha u Kpa (Blei). “Un wan mihpaw ha kaba arsien khlem pop shuh” Hebru 9:28 ka mut ynda un wan pat ha ka jingwan kaba arsien, un wan ym shuh kum u nongbah pop, un ym bah shuh ia ka pop ki bynriew ka pyrthei, hynrei un wan ban BISHAR BAD BAN SYNSHAR, kata ruh “Ha kita kiba ap khmih lynti ia u, ia ka jingpynim” Hebru 9:28. Hynrei um wan na ka bynta ki bym ngeit bad kiba ialeh pyrshah ia ka jingaiei, hynrei un wan na ka bynta kito kiba ap khmih lynti ban ioh ka jingpynim, bymjukut na u.
Ynda u Jisu Khrist un wan pat sha kane ka pyrthei, un ym wan ban mab pop, lane un ym wan ban shah iap biang ha diengphna ha Kalbari, hynrei un wan ha ka burom bakhraw kum u Syiem ki Syiem, u Trai ki Trai ban bishar bad synshar 1000 snem. Jingpynpaw 20:4.
U Jisu u la dep thied ia ki briew shisien da ka snam jong u hi na ki kti u soitan, u Jisu u la dep siew ka dor ba rem na u soitan ban pyllait luid ia ki briew na ki pop baroh. Kumta ynda un wan pat ha kaba Arsien, un wan khlem bah pop shuh, un wan na ka bynta kito kiba khmih lynti ia u, IA KA JINGPYNIM KEIN.
Lada ka pyrthei ka ngeit, kan iohi jingpynim, hynrei ki bym ngeit ki la rem lypa. Ioannis 3:18.Kumta, “Da ka snam bakordor jong u Khun langbrot ba khlem pop khlem thoh bria ka jong u Khrist kein ia uba la thmu naduh bym pat seng nongrim ia ka pyrthei, hynrei la pynmihpaw ia u ha kine ki ia kiba khadduh na ka bynta jong phi” 1 Petros 1:19-20. Namarkata, ka Testament ka donbor haba la jia ka jingiap u Jisu halor diengphna, namar mynno mynno ka la donbor haba dang im uta uba la thaw ia ka? Ym shym la pynkyntang wat ia ka Jutang banyngkong khlem ka snam, bad khlem kaba pynmih snam, ym don jingmab” Hebru 9:15-22.
U Blei u la mab noh ia ki pop baroh, haba u la pyndam noh ia ka Ain ba la thoh lem bad ki kyndon jong ka (Having cancelled the written code, with its regulations) kiba long pyrshah ia ngi (that was against us and that stood opposed to us); u la shim noh ia ka (He took it away) bad sah prek ia ka ha Diengphna (nailing it to the cross)” Kolossai 2:13-15.
U Jisu u la sah prek ia ka pop halor Diengphna te uba iai leh ia ka pop. U iai leh ruh ia ka jingpalat hukum, te ka pop, ka long ka jingpalat hukum. 1 Ioannis 3:4.
Jar uba iai leh ia ka pop, u long na u soitan naba u soitan u ju leh pop naduh mynnyngkong” 1 ioannis 3:8.
To ngeit, “Ka pop kan ym donbor shuh halor jong phi: naba phim long hapoh KA HUKUM, hynrei hapoh KA JINGAIEI” Nong Rom 6:14.
U bangeit ym ym pynrem, u bymngeit u la rem lypa, naba um shym la ngeit ha ka kyrteng u Khun u Blei ba la kha marwei. Ioannis 3:18.