La pynbiang bor pahara, na bynta ka sngi Laitluid, ong u DC

Shillong, 13 Nailar:
U Deputy Commissioner ka East Khasi Hills u Bah Peter S Dkhar ula ong ba ka sorkar ka la pynbiang ia ki bor pahara na ka bynta ka jingrakhe ia ka sngi Laitluid ka ri ha ka15 tarik Nailar.
”Nga la shong jingialang bad u Superintendent of Police  halor ka jingpynbiang ia ki bor pahara na ka bynta ka jingrakhe laitluid ka ri. Katkum ka jingtip ba la ioh, kam don eiei ban khuslai halor ka jinglong jingman ka ain ka kanun. Baroh kiei kiei ki biang nadong shadong”, la ong u Bah Dkhar haba iakren bad ki nongthoh khubor hynne ka sngi.
U la ong ba ka jing pyndonkam ia ki bor pahara, la leh katkum ka jingdonkam bad ka jing dawa ka kama.
Katkum ka jingong u DC kam shym la don kano kano ka jingwan rung beain ki lehnoh na ri Bangladesh. “Ngi la long kiba la khreh ban iakyn duh ia kano kano ka jing iatynjuh”, la ong u DC.
Ka bor synshar ka East Khasi Hills district  ka la pynkhreh ban rakhe ia ka sngi laitluid ka ri ha ka rukom kaba ishongkun bha.
Haba iathuh ia kane, u Deputy Commissioner u Bah Peter S Dkhar u la ong ba kin sdang ia ka jingrakhe da ka jingpynher ia ka lama ha baroh ki ophis sorkar ha ka por 7 baje mynstep.
U la ong hadien  ba la pynkiew ia ka lama, kin don ki prokram ba kongsan ha madan Polo naduh ka por 9 baje mynstep ha kaba yn don ka jingiaid shipai ki khynnah skul, ki shipai, ki pulit.
“Hadien kane ka prokram ba kongsan, kan don ka jingialehkai kynjatbol jong ki kynthei hapdeng ka Royal Wahingdoh bad ka Sanbhalang FC, Lawsohtun,” la ong u Bah Dkhar.
Ha kajuh ka por, u la iathuh ba ka bor synshar district kan pynlong ia  a jingdro dur ha Ram Krishna Mission Vivekananda Cultural Centre ha Quinton Road.
Katkum ka jingong u DC, ki kam tamasa ba kham kongsan kin long ha Khyndai Lad naduh ka por 12 baje mynsngi.
U Deputy Commissioner u la ong ba ka prokram ha Khyndai Lad kan sdang da ka jingpyni riam da ki kynnah skul, kin don ruh ki jingtem jingput phareng nalor bun kiwei pat.
U la ong ba ki nongjop jong ka Meghalaya Got Talent bad ka Choir na Jyoti Sroat School kin pyni ia ki sap jongki ha kane ka prokram.
U Bah Dkhar  u la ong ba kan don ka jingsam tupia ei ha katei ka sngi ha Khyndai Lad. U Deputy Commissioner u la ong kin don 33 tylli ki jaka die jingbam ha katei  ka jaka.
Kan don ruh ka jingpyni phlim ha Payal Cinema, Bijou Cinema, Galeria Gold Cinema por 11 baje mynstep.
Ki phlim ban pyni ki long kum ka Jurassic World (Bijou Cinema bad Galeria), ABCD 2 (Payal Cinema) bad ka Brothers (Gold Cinema).
Kan don ruh ka jingtem jingput jong ki shipai Indo-Tibetan Border Police (ITBP) ha Nan Polok.