La poi u Akon, u BoneyM ha Guwahati, 15 tarik yn pynlynguh ia ki paidbah ha Madan kurkalang

Shillong: U nongrwai ba pawnam ka pyrthei u Akon bad ka kynhun rwai ba paw ka BoneyM, kila wan poi ha nongbah Guwahati mynta ka sngi.

Kine ki kynhun nongrwai kin pynlynguh ha ka tamasa Cherry Blossom kaban long ha ka 15 tarik bad ha ka 16 tarik mynta u bnai ha madan kurkalang, Lumdaitkhlaw, Bhoirymbong. Da ki phew hajar ki paidbah na jylla Meghalaya bad kumjuh nabar, kila ap khmih lynti ban leit pynhun ialade da ki jingrwai ba shoh jong kine ki nongrwai nalor kiwei pat ha kitei ki sngi. Kine ki nongrwai kila pynpaw ia ka jingkwah dik dik ban ioh ban rwai noh ha katei ka lympung ban pynhun mynsiem ia ki paidbah ka Meghalaya bad kiwei. Kane ka dei ka sien kaba ar ha ka tamasa cherry blossom ba ki nongrwai ba pawnam na ka pyrthei kin wan. Mynshem snem, ki nongrwai ba pawnam kum u Neyo, bad u Ronan Keating, Jonas Blue, Sanam bad kiwei kila pynhun ia ki paidbah ha katei ka lympung. Mynta u snem, nalor u Akon, BoneyM, Clean Bandit, u Lucas na Korea, R3HAB (rehab) bad kiwei kin pynthnem ia katei ka madan. Ia kane ka tamasa yn plie u Jyotiraditya M. Scindia, Myntri ba dei khmih ia ka Tnad Development of the North Eastern Region (DoNER) ha ka janmiet jong ka 15 tarik Naiwieng.