La plie palat 34klur, ki loan account, lyngba ka PMMY

Shillong:Ka la dap 7 snem, ka jingkynthup ia ki briew hapoh ka jingplie lad ioh shim ram lyngba ka Pradhan Mantri MUDRA Yojana (PMMY).

La plie ia ka PMMY da u Myntri Rangbah Duh, u Narendra Modi ha ka 8 tarik u Iaiong, 2015 ban plie lad shim ram haduh T. 10 lak na ka bynta ki kam ki bym dei ki kompani bad ki kam ki barit baria kiba lait na ki kam rep.
Ha ka jing rakhe ia kane ka lyng khuh dap 7 snem jong kane ka skhim, ka Myntri Sorkar Pdeng kaba dei khmih ia ka tnat Finance & Corporate Affairs ka Nirmala Sitharaman ka la ong, “ka long kaei kaei kaba khraw ba la dep plie palat 34.42 klur tylli ki loan account kiba kot sha ka T.18.60 lak klur hapoh ka skhim na ka bynta ka jingsdang ia ki kam kiba thymmai.”

Halor ka phang jong ka jinglong jingman ki kam khaii bad ki lad ioh kam kiba bun kiba wan na ka PMMY, ka Myntri kam pla tyngka ka la ong, “Ka skhim ka la iarap ban wanrah ia ka jinglong jingman kaba plie lad khamtam ia ki kam ki barit baria bad ka la plie lad ioh kam ha ki jaka nongkyndong. La dep sanction palat 68% ki loan account sha ki longkmie bad 22% jong kine ki loan la ai sha ki nongseng kam thymmai ki bym pat ju shim ram naduh ba la sdang ia kane ka skhim.”

Ka Myntri ka la ai khublei ia baroh kiba ioh jingmyntoi na ka skhim MUDRA bad ka la kyntu ia kiwei kiwei kiba dei ban ioh ia kane ka skhim ba kin wan shakhmat ban iashim bynta ha ka jingtei ia ka ri. “51% jong baroh ki loan ba la sanction haduh mynta ki dei hapoh ka thup SC/ST/OBC bad kane ka pyni ba ka Pradhan Mantri Mudra Yojana ka ieng na ka bynta ka hok ha ka imlang sahlang bad ka dei ka dak jong ka ‘Sabka Saath, Sabka Vikas’, kumba la thmu da u Myntri rangbah Duh jong ka ri.”
Ha kane ka kynti, u Myntri Khynnah ka tnat pla tyngka, u Dr Bhagwat Kisanrao Karad u la ong, “Ka nongrim jong ka Pradhan Mantri Mudra Yojana (PMMY) ka dei ban pynbiang ia ki lad shim ram ki kam barit baria ha ka rukom kaba lait na ki jnit ki jnat.”
“Da kaba ai jingiarap ia 34.42 klur ki nongdon account, ka skhim ka la kynthup ia kito kiba kwah seng kam lajong ha kine ki hynniew snem ba la dep,” u Myntri Khynnah u la bynrap.

Ha kaba iadei bad ka jingtuid jong ka jingai ram, u Myntri Khynnah u la ong, “Kawei pat ka jingpeit bniah jong ka PMMY ka dei ban plie lad ioh ram ia kito kiba sah ha ki ‘aspirational distrik’ kumba la ithuh da ka Niti Aayog, bad kumta ka pynthikna ia ka jingplie lad ioh ram ha kine ki distrik kiba dang sah dien bha ha kane ka kam.”
Ka jingpyntreikam ia ka jingkdup ia baroh hapoh ki kam kiba iadei bad ka ioh ka kot ha ka ri ka dei kaba la buh nongrim ha lai tylli ki rishot kiba long, ka jingwanrah ia ki kam bank sha kito ki bym pat ju ioh ia kane, ka jingpynshngain ia kito kiba don ha ka jingma bad ka jingplie lad pynioh jingkyrshan pisa sha kito ki bym ioh ia kane. Hapoh kane ka prokram ba dang iaid shakhmat, dang pynurlong ia kine ki lai tylli ki thong da kaba pyndonkam ia ka teknoloji bad da kaba trei ha ka rukom kaba don ka jingiamir jingmut bad ka jingiatreilang jong kito kiba don bynta ha kine ki kam.

Kawei na kine ki lai tylli ki rishot lane ka jingpynbiang ia ka jingkyrshan pisa ia kito ki bym ioh ia kane ka paw shai ha ka rukom treikam ka PMMY ia kaba la pyntreikam da ka thong ban plie lad shim ram ia kito kiba trei ia ki kam barit baria. Ka PMMY ka peit bniah ia ki jingdonkam pisa jong ki nongseng kam thymmai bad ki nongrep, lyngba ki sienjam bapher bapher hapoh ka skhim.
Ka dei ka sienjam kaba kongsan na ka bynta ka jingpynbiang ki lad ai jingiarap pisa sha kito ki bynta jong ka imlang sahlang kiba la shah ieh bein. Ka Pradhan Mantri MUDRA Yojana (PMMY) ka la plie lad ia ki million ngut ki briew bad ka la kyntiew ruh ia ka jingsngewshngain bad ka jingsngew laitluid jong ki.
Hato ngin ia khmih hangne ia ki mat ba kongsan jong ka PMMY bad ki jingjop jong ka ha kine ki 7 snem ba la dep:
Ki mat ba kongsan jong ka Pradhan Mantri Mudra Yojana (PMMY), ki kynthup ia ka jing ai ram haduh T. 10 Lak lyngba ki Member Lending Institution (MLI) lane ki; Bank, ki Non-Banking Financial Company (NBFC), ki Micro Financial Institution (MFI), bad kiwei kiwei kiba trei ha ki kam pisa, ha ki lai tylli ki thup kiba long, ‘Shishu’, ‘Kishore’ bad ‘Tarun’ kiba dei ki dak jong ka jingkiew shaphrang bad ka jingdonkam pisa jong kine ki nongshim ram. (i) Shishu : ki ram haduh T. 50,000/- (ii) Kishore : ki ram kiba palat T. 50,000/- haduh T. 5 lak (iii) Ta run : ki ram kiba palat T. 5 lak h aduh T. 10 lak.
Ki jingjop jong kane ka skhim (Haduh ka 25.03.2022)
Palat 34.42 klur tylli ki jingai ram kiba kot sha ka T 18.60 lak klur ki dei kiba la sanction naduh ba la sdang ia ka skhim (haduh ka 25.03.2022). Kumba 22% jong baroh ki jingai ram ki dei na ka bynta ki nongseng kam lajong ba thymmai.
4.86 klur tylli ki loan account PMMY ki dei kiba la ioh sanction haduh T. 3.07 lak klur ha une u snem mang tyngka (haduh ka 25.03.2022)
Kumba 68% jong baroh ki jingai ram ki dei na ka bynta ki longkmie kiba seng kam lajong. Bun ki loan ki dei kiba kumba T 54,000/-, 86% jong ki jingai ram ki dei hapoh ka thup ‘SHISHU’; Jan 22% jong ki jingai ram ki dei na ka bynta ki nongseng kam lajong kiba thymmai; kumba 23% jong ki jingai ram ki dei na ka bynta ki nongshim ram SC bad ST; Kumba 28% jong ki jingai ram ki dei na ka bynta ki nongshim ram OBC (baroh 51% ki jingai ram ki dei kiba la sanction na ka bynta ki nongshimram kiba hap hapoh ki thup SC/ST/OBC); kumba 11% ki jingai ram ki dei kiba la ai sha ki briew ba rit paid.