La plie paidbah ia ka dukan die Jain Ryndia bad ki tiar shna kti ha Mawdiangum

Nongpoh: Hynnin ka sngi Saitjain, u Bah Mayralborn Syiem, MLA Nongpoh, u la leit ban plie paidbah noh ia ka kawei ka dukan ba die ia ki jaiñ Ryndia, ki tiar shna kti, bad ki jain bala oh shrong bad pynwandur da ki jaiñ Ryndia haki rukom bapher bapher kaba don harud surok bah National Highway bad kaba hap hapoh ka shnong Mawdiangum.

Katei ka dukan ba kham pher na kiwei pat ki dukan, ka dei ka jong u Bah I.A Diengdoh, ophisar ba la shongthaid na ka tnad Sericulture bad Textile, ha kaba kiba la donlang ha katei ka sngi ba la plie paidbah ia katei ka dukan, ki kynthup ia u Bah FR Kharkongor Commissioner and Secretary ka sorkar Meghalaya, ka Kong RB Lyngwa District Sericulture Officer, kiba haiing hasem bad kiwei kiwei ki riew rangbah.

U Bah I.A Diengdoh, haba kren sha ki lad pathaikhubor, u la ong ba ka jingthmu jong u, ban plie ia katei ka dukan ka long ban pyniaid iew ïaki jaiñ ryndia kiba pynmih na Ri-Bhoi kumba bun naki nongthaiñ jaiñ ki ud bad ïam ruh namar ka jingbym biang jong ka ïew ka hat bad kaba sngewsih ka long ruh ba kala don ka jingkam trai wat na kiwei ki jylla ïaki jaiñ bala thaiñ da ki nongthain jain ka Ri-Bhoi.