La plie ia ka jingkieng nar ban iaid ki kali kitkhia ha Dwar ksuid Umroi

Nongpoh: U Bah Prestone Tynsong, Symbud Myntri rangbah ka sorkar jylla, mynta ka sngi, u la leit ban plie paidbah noh ia ka Jingkieng Nar ha Dwar Ksuid kaba don ha Umroi, Ri Bhoi District.

Kiba la sakhilang ha katei ka sngi kaba la plie paidbah ia katei ka Jingkieng nar, ki kynthup ia u Bah George B. Lyngdoh, MLA ka Umroi, nangta u Bah Samla Malngiang, Myntri barim ka tnad PHE, u Additional Chief Secretary, u Bah D.P Wahlang, ka Deputy Commissioner ka Ri Bhoi, ka kong R.M Kurbah, ki ophisar na ka Border Road Organisation (BRO) bad National Highway Authority of India.

Lah ruh ban kdew hangne, ba ia katei ka Jingkieng la tei kyrkieh kyrkieh, namar ba la don jingthut bad jingsynjor ha ka Jingkieng Dwarksuid, ha kaba ki kali heh bad kiba kit khia kim lah ban iaid lyngba katei ka Jingkieng, hynrei na ka bynta ban pyniaid beit ha ka jingiaid ki kali kitkhia, ka sorkar jylla ka la aiti noh ha ka BRO bad NHAI ba kin shna noh ia katei ka Jingkieng nar, khnang ba ki kali kitkhia kiba donkam ban iaid lyngba ka surok Shillong By-pass, ki lah ban iaid lyngba katei ka Jingkieng.