Nongpoh: Ka Iew Masi kaba don ha Baridua, Ri Bhoi, kaba la shah khang noh shipor, hadien ba wan tuklar da kawei ka kynhun na shabar jylla, kaba la tip kum ka Gau Gyan Foundation, la plie paidbah noh myn hynnin ka sngi, kata ka long hadien ba ka Kong RM Kurbah, Deputy Commissioner ka Ri Bhoi, ka la phah da ka jingthoh ba la ailad ban plie biang ia katei ka Iew Masi.
Kiba la donlang ha kaba plie biang ia katei ka Iew, ki kynthup ia u Ken Syiem, Syiem ka Raid Marwet, u Myntri ka Hima Mylliem, u Basan Nongkseh, u Myntri Langstieh lem bad kiwei.
Lah ruh ban kdew hangne, ba shipor la khang ia katei ka Iew Masi, kata ka long hadien ba ha ka 27 u Rymphang, ka la don kawei ka kynhun na shabar jylla kaba la tip kum ka Gau Gyan Foundation, ka la leit ban khynra ia katei ka Iew bad ha katei ka jingleit khynra, ka la pynmih ruh shibun ki jingkynnoh bad kaba la pynlong syndon ban khang shipor ia katei ka Iew.
Haba ai jingkren halor katei ka iew bad ban pynshai ia ki jingkynnoh da ki nongialam katei ka kynhun nabar jylla, u Myntri Langstieh bad u Basan Nongkseh, ki la ong ba ka jingkynnoh da ki nongialam ka Gau Gyan Foundation, ka dei ka bym don nongrim haei haei ruh em bad ki dei tang ki jingkynnoh kiba khlem nongrim.
Ki la ong ruh, ba katei ka Iew ka dei kaba la ithuh da ki bor ba halor bad ka dei ruh kaba la slem bah, kaba la dep ban suit ban shor ba kan long kum ka Iew masi bad ka ban pynbiang masi sha kiba bun ki iew kiba don ha Ri Khasi Jaintia.
Ki la pynshai ruh ba ki masi kiba mih na katei ka Iew ki dei kiba la dep ban khmieh bniah da ki doctor mrad na ka tnat Veterinary, ki la pynshai ruh ba ki masi kiba mih na katei ka Iew ki dei ban bsa beit thik tang ia ki nongbam doh masi ha Ri Khasi Jaintia, hynrei halor ka jingshah kynnoh ba na katei ka Iew la shalan shabar jylla, ki la ong ba kim don jingtip ei ei ruh em.
Haba la plie biang hato ki nong die doh kin pynhiar ne em ia ka dor doh masi? Lada m te ka mut ba ki shu kwah ioh nong kput ym bym ioh masi kumba ki ong.