La plie ia ka hospitalthymmai St Aloysius ha Ummulong

MM Thaiang
Jowai: Ia ka Aloysius Hospital kaba heh ha Ummu long West Jaintia Hills District, kaba pyniaid da ki Sisters, Hospitallers Sisters of Mercy, la plie ha kane ka 8 tarik mynta u bnai da ka Sister Elsina Arackal (Sister Supperior jong kane ka Hospital) bad la kyrkhu ia kane ka Hospital da ka Umkhuid Umkyntang da u Most. Rev. Victor Lyngdoh dd, Bishop ka Jyllaniam Jowai.
Ha shwa ban plie la pynlong ia ka jingialang kaba lyngkot ha phyllaw jong kane ka Hospital.

Ka Sister Elsina Arackal ha ka jingkren plie jong ka ia kane ka Hospital,ka pynpaw ka jingsngewnguh ia u Most. Rev. Victor Lyngdoh, Bishop ka Jylla Niam Jowai uba la ai jingbit ia ki Sisters Hospitallers Sisters of Mercy ban tei ia kane ka Hospital ha ka ban iarap ia ki briew ha ka liang ka jingkoit jingkhiah bad ka ainguh ia u Blei Trai kynrad ba da ka jingkyrkhu jong u (Blei) hadien ba la ioh jingbit la lah ban sdang bad tei shisyndon ia kane ka Hospital ha ka ban iarap ia ki briew katba lah ei ha ka liang ka jingkoit jingkhiah. Nangta ka la ong ba wat lada ka jingtrei ia kane ka Hospital ym pat lah ban pyndep bha bad ka jingtrei ka dangiaid shait shait, la katta ruh la lah ban plie mynta ka sngi (8/2/2020) ba ki Sister jong kane ka Hospital kin ioh shong iohsah ban nang pynkhreh bad pynbeit ia ki kamra shong kamra sah ki Sister bad pynkhreh ia ki kamra ki Doctor bad ki kamra thiah ia ki nongpang. Nangta ka Sister, Elsina Arackal, ka ong ia kumba long mynta kane ka Hospital ka dang plie tang ia ka Pharmacy bad ynda la dep janai ban pyntrei dep ia ka iing bad wan ki Doctor kin sa ai ka jingpynbna paidbah ba ki briew kin tip ban wan shah sumar ha kane ka Hospital.

Ha kane ka sngi la ioh ruh ia ka jingkren kyrkhu kyrdoh ia kine ki Sister kiba trei ha kane ka Hospital da u Most. Rev. Victor Lyngdoh, Bishop ka Jylla niam Jowai bad bud sa ka jingknia Mass bakhuid kum ka dak ka jingainguh ia u Blei bad ban nangpan shuh shuh ia ka jingkyrkhu na u Blei ba Un nangtheh ka jingkyrkhu kyrdoh halor kine ki Sister kiba pyniaid ia kane ka Hospital, ia ki Doctor ki Nurse ki ban wan trei ha kane ka Hospital bad ia ki nongpang kiba wan shim dawai bad shah sumar ha kane ka Hospital ha ki por bad ki sngi ki ban dangwan ba ki dawai ki dashin bad ka jingsumar ba ki ioh na ki Doctor na kane ka Hospital kin ioh ia ka jingkoit jingkhiah kumba ki thrang bad angnud.

Ha ka juh ka por u Bishop Victor u kyntu ia ki paidbah kiba don ha kane ka jingialang plie ba kin iatreilang bad ki Sister kiba pyniaid ia kane ka Hospital ba kane ka Hospital kan nangiaid shaphrang ha ka ban iarap ia ki briew ba kin ioh ia ka jingkoit jingkhiah.