La on thang donburom ia U bah RG Lyngdoh

Shillong: Ia ka met ba dangsah jong u bah Robert Garnett Lyng doh, u ba dei u MLA barim jong ka Laitum khrah constituency, la ioh ban rah bad leit thang noh mynhynnin ka sngi, ka 31 tarik u naitung 2022, ha kaba la onthang ha ka Electric crematorium kaba don ha Mawprem.

Ha shwa ban leit on thang, na ka liang jong kiba ha iing hasem ki la pynlong bad pyndep ia ka niam ka rukom ha iing sah jong u ha Nongrim Hills por 1:00 nohsngi.
Kum ban shu pynkynmaw, ba u bah Robert u la khlad noh ha ka sngi thohdieng ha ka iingsah jong u ha Nongrim hills, Shillong hadien ka jingban jong ka jingshitom bad u bah RG Lyngdoh, ula khlad noh ha ka karta kaba 62 snem bad u la ieh shadien ia la ki khun bad kiba ha iing ha sem.

U bah RG LYNGDOH u dei u khun jong u bah Peter Garnett Marbañiang, uba dei ruh u riew saiñ pyrthei, bad u ba dei ruh u hynmen jong ka MLA ka East shillong, Dr. Ampareen Lyngdoh bad ha ka snem 1998 bad ha u snem 2003 ula mih khmat ia ka Laitumkhrah konstitwensi.
U bah RG Lyngdoh, ha shwa ba un khlad noh na ka sla pyrthei, ula bthah ia kiba ha iing hasem ba ynda iap kin dei ban shuthang ym ban shu tep bad ka kong Ampareen kaba dei ka para jong u, ka la ong ba kumba u hynmen jong ki u kwah, ki ruh kin pynhun ia ka jingkwah jong jong u bad kumta ki la shu thang ia u ha ka jaka thang kaba don ha Mawbah.

U bah R.G Lyngdoh, u dei u wei na ki myntri barim jong ka sorkar jylla uba la paw bha ha ki snem kiba laleit, namar ba u dei uba shlur ban kren ne ban leh ia kaba dei.
Ha ka samoi treikam jong u kum u nongmihkhmat, ula bat ruh iaka shuki myntri sorkar bad khmih ruh ia ka tnat treikam bapher bapher kum ka kam poh?ing bad kiwei kiwei. U bah R.G ula pyndep ia ka jingpule ‘post Graduate Diploma’ haka tbad Business Management-XLRI, Jamshedpur. Hadien kane ula trei bad ka Mafatlal Group of Companies ha Mumbai, Kolkata bad ka thaiñ shatei Lam Mihngi.

U bah Robert lyngdoh ula iadon bynta ruh ha kaban kyntiew ia ki kam ialehkai hapoh ka jylla, kum u President jong ka Meghalaya Table Tennis Association bad kam seng saiñ pyrthei kum u President ka shillong City Congress Committee.
Ha kane ka sngi leit on thang ia u bah Robert la iadon ryngkat ki nongialam jong ka sengsaiñ pyrthei, ba kynthup ia u President jong ka Meghalaya Congress Party bah Pala, u bah Sanbor Shulai u ba dei u MLA jong ka South Shillong bad u MLA ka North Shillong u bah Adelbert Nongrum, nalor kiwei pat.