La nang kiew, ka tyndong lyer shet

Shillong:Ki dor jong ka tyndong lyer shet jingshet ne ki Liquefied Petroleum Gas (LPG) la nang pynkiew dor mynta nangne shakhmat sha ka T. 266.

Ki tyndong lyer shet jingshet ba ju pyndonkam ha ki jaka khaiï ne die jingdie (Commercial cylinders) kiba khia 19 kilo kumba long mynta hapoh Nongbah Delhi kin rem haduh T. 2000.50 nangne sha khmat na ka jingrem kaba long mynshwa, T. 1734.
Ha kawei pat ka liang, kan dang long ka jingpynhiar mynsiem ïa mynta shipor ïa ki nongpyndonkam tyndong lyer shet jingshet hapoh ki ïing ki sem namar ym pat shim ka rai ban pynkiew dor.

Hadien ka jingkyntiew sha ka T. 266, ka dor jong ka commercial LPG cylinder kumba long mynta ha Nongbah Delhi ka la kiew sha ka T. 2000.5, kaba mynshwa ka long T. 1735.5. Katba ha Mumbai ka la poi T. 1950 na ka bynta kaba 19 kilo. Ha Kolkata, ka tyndong lyer kaba khia 19 kilo ka la kiew sha ka T. 2073.50, katba ha Chennai ka tyndong lyer kaba khia 19 kilo ka la kiew sha ka T. 2133.

Kham ha shwa, ki dor jong ka Liquefied Petroleum Gas (LPG) kaba shet jingshet ha baroh ki jait tyndong lyer kynthup ïa kiba la pynduna dor, la pynkiew kumba T. 15 shi tyndong lyer ha u bnai ba lah dep. Kane ka jingkiew dor mynta duna ïa ka arbnai ka la kiew kumba saw sien. Ka tyndong lyer kaba la pynduna bad kaba khlem mab dor la kyntiew sha ka T. 25 shi tyndong ha ka 1 tarik u bnai Risaw
Ka jingkiew ka LPG kaba la pynduna dor haba kheiñ lang naduh ka 1 tarik u Kyllalyngkot haduh mynta ka la poi sha ka T. 205 shi tyndong.