La nang jan ka thma ka Russia bad ki ri sepngi, na ka daw jong ka Ukraine

Ka Russia, ka maham tyngeh ba kan sa khie ka thma niwkliar bad ki ri sepngi, halor ka jing ia khun jongki, na bynta ka Ukraine.

Ha kajuh ka por, ka Russia, ka la nang pynkhlain ia ki tiar ialeh jongka, ha khappud jong ka Ukraine bad ki video kiba la iohi ha ki social media, ki pyni ba ka don ka jing kilan met kaba jubor bha bad la iathuh ba ka Russia, kan lah ban hiar thma ha kano kano ka por ia ka Ukraine, lada jia ba ki ri sepngi, kim mynjur ia ki kyndon ba ula buh ha khmat jongki.

Na ka liang ka Russia, ka dawa ba ka Ukraine, kam dei ban iateh lok bad ki ri sepngi, ha ka kynhun jong ka NATO bad ka dawa ba ki ri sepngi, kim dei ban buh ia ki tiar ialeh jongki, ha ki jaka, kiba don ha syndah bad ka Russia, wat la ki dei kiba ia synrop lang bad ka NATO.

U Sergei Ryabkov, myntri khynnah ka tnat bar ri jong ka Russia, haba kren ha ki lad pathai khubor, ula ong “Ngim kwah ba kan don ka jing ia kynad, ngim kwah ia ki jing ialeh thma” hynrei, u ong shuh shuh “Ngi dei ban sangeh shi syndon, na ka jing nang pyniar hima ka NATO, ka jingtei ia ki tiar ki tnar bad ka jing pyni bor ka NATO sha ki thain mihngi bad ngi dei ban pyn sangeh na ka jing iasnoh ka Ukraine bad ka NATO”.