|
Da u Bah Philip Marweiñ
Ka Sorkar India ka la dep mynjur ban nang ai bor shuh shuh ia ki 10 tylli ki District Council, kynthup ia ki lai tylli ki District Council jong ka Meghalaya. Ia kane la rai da ka sorkar National Democratic Alliance (NDA) ha ka 23 tarik jong u bnai Kyllalyngkot (January), 2019 ba la lamkhmat da ka BJP. La pynlah ia kane da kaba pynbha bad pynwandur (Amend) ia ka Article 280 bad ia ka Sixth Shedule jong ka Riti Synshar jong ka Ri India.
Katkum kane ka jingpynwandur thymmai (Amendment) ia ki District Council yn khot kyrteng noh da ki Autonomous Territorial Council. Kum ka nuksa ia ka Khasi Hill Autonomous District Council yn khot kyrteng noh da ka Khasi Hills Autonomous Territorial Council, ia ka Garo Hills District Council ruh yn khot kyrteng noh da ka Garo Hills Autonomous Territorial Council. Ia ka Jaintia Hills District Council ruh yn tip kyrteng noh kum ka Jaintia Hills Autonomous Territorial Council. Ia kiwei kiwei ki District Council jong kiwei ki jylla ruh yn khot noh kumta. Nangta, ia ki MDC seat ruh yn kham pynbun noh na kaba ju don. Na ka bynta ka Jaintia Hills na ka 30 seat la kyntiew noh sha ka 35, na ka bynta ka Khasi Hills na ka 30 la kyntiew sha ka 40 bad na ka bynta ka Garo Hills ruh na ka 30 ka pynkiew sha ka 40.Ha Karbi Anglong bad Dima Hasao District Council ruh la pynbun ia ki seat MDC. La kyntiew noh kumne namarba ka la don ka jingdawa napoh ka Jylla Meghalaya bad Assam bad katkum ka oskular bad ki kaikhlaw UPDS jong ka Karbi Anglong, DHD jong ka Dima Hasao bad ka ANVC jong ka Garo Hills. Nangta kane ka jingpynwandur thymmai (Amendment) ia ki District Council ka mang kyrpang ruh ba 33% na ki seat MDC ba dei ban mang kyrpang na ka bynta ki kynthei. Kane ka bynta jong ka jingmang kyrpang ia ki seat MDC na ka bynta ki kynthei ka treikam tang ki District Council jong kiwei ki jylla, ym ha Meghalaya. Nangta ha kine ki Council dei ban don ar ngut ki nominated MDC. Kane ruh ka la iarap shuh shuh ban pynbun ki nongmihkhmat MDC ha ki District Council jong ka jylla Meghalaya. Hooid, kane kan ktah bha ia ka jinglut jingsep jong ki pla tyngka jong ki Council hynrei ka iarap pat ban ioh kham bun ki nongmihkhmat MDC hynrei ia ka jingpynlut baroh la ioh peisa pat na ka sorkar India lyngba ka Finance Commission da kata ka Direct Funding lane ka Devolution of Funds.
Kawei pat ka bynta kaba kongsan jong kane ka Amendment lane ka jingpynwandur thymmai ia ka Sixth Schedule ka long ba dei ban jied ia ki nongmihkhmat (elected members) ha ki dorbar shnong (Village Councils) bad ki nongmihkhmat ha ki dorbar sor (Municipal Copuncils) kiba hap hapoh ki District Council lane kita ki Aotonomous Territorial Council. Kane ka mut dei ban jied da ka ilekshon ia ki nongkitkam jong ki shnong bad ki nongkitkam jong ki jaka sor kiba hap hapoh kine ki Autonomous Council. Kane ka mut ba dei ban don da ka democracy kaba pura lane ka synshar paidbah kaba pura ha ki dorbar shnong bad ki dorbar jong ki sor. Kane ka mut ba u paidbah u donkam ban don ka sur bakhlaiñ bha ha ki kam shnong bad ki kam sor, ym dei ban shu tip sop sop tang ki khyndiat ngut ki briew ia kiba la jied tang da ki khyndiat ngut, katba ki paidbah kim don bor bad kim don sur ei ei kaba wanrah ia ka jingsniew. Ym tang katta, kane ka jingpynwandur thymmai (Amendment) ka ong shai kdar ba ha kine ki Village Council bad Municipal Council dei ban don lang bad ki kynthei lane 33 % lane 1/3 dei ban don ki kynthei. Kane ka long ban pynthikna ba ki nongkitkam jong kine ki dorbar shnong bad ki dorbar sor dei ban don lang bad ki kynthei bad kane ruh ym dei ban duna ia ka 33%. Kane ka mut ba ka sur bad ka kam kam dei ban long tang jong ki shynrang rangbah hynrei dei ban don lang bad jong ki kynthei. Kane ka mut ba ha ka democracy kan synshar lang bad kynthei bad shynrang. Hynrei, kane ka Amendment ka la pyllait noh ia ka Meghalaya. Kane ka mut ka Meghalaya ka lait na ka jingiajied nongmihkhmat ha ki dorbar shnong bad dorbar sor (Municipal Council) bad kumjuh ruh ka lait na ka kata ka 33% quota ha kine ki dorbar shnong bad Dorbar sor (Municipal Council). La sngewthuh ba ka Meghalaya ka lait noh na kane namarba la pyrshah da ka sorkar jylla bad ka Synjuk ki Rangbah shnong. Kane ka long kaba sniewbok namar katkum ka por bad ka juk kine ki jingkylla ki dei ban wan bad ban saindur thymmai katkum ka jingiaid jong ka por. Nalorkata, ka jingpyllait ia ka Meghalaya na kane ka bynta, ka wanrah ia ka jingduh kaba khraw na ka liang ka jingioh phoida tyngka na ka Finance Commission na kata kaba ki ju tip kum ka Direct Funding sha ki shnong bad ki Municipal Council. Mano ban duhnong, hato kim dei ki paidbah hi ha ki shnong bad ki jaka sor? Nalorkata, lada la don ki ilekshon na ka bynta ki nongkitkam shnong bad ki nongkitkam ha ki sor kan wan ka Direct Funding sa naka Pynchati Raj Ministry bad kata ka jingmyntoi kan nang jur nang jur.
Shuh shuh, katkum ka jingpynwandur thymmai (Amendment) jong ka Sixth Schedule la aiti ha ki District Council a kumba 30 tylli ki Subject kaba khlainbor bad kiba metdoh bha kum ka PWD, ka PHE, ka Forest, Health, Urban Development, Food bad Civil Supply bad kiwei kiwei, bad na ka bynta ka jingpyniaid ia ki kam ki jam jong ki District Council ha kaba iadei bad kine lem bad kiwei kiwei de, la bei tyngka da ka Union Finance Commission. Ha kane ka rukom la nang pynkhlaiñ bad nangai bor ia ki District Council. Mynshuwa ka sorkar India ka la shu ai jingiarap katba lah katkum ka Article 275 hynrei mynta pat la ai bor bad hukum direct da ka Amendment ba ka Finance Commission ka dei ban bei tyngka (mandated) ia ki District Council, ia ki dorbar shnong bad ia ki dorbar sor ne kita ki Municipal Council.
Katkum kane ka Amendment la ai bor ia ki shnong ban pynkhreh ia ki plan bapher bapher na ka bynta ki kam pynroi pynsan ha kaba iadei bad ka rep ka riang, ban pynbha bad pynjanai ia ki khyndew ki shyiap, ban don ka jingpynwandur bha ia ki khyndew ki shyiap, kumno ban peit ia ka ring umrep, ban peit bha ia ka um ka wah bad na ka bynta ka jingdonkam ia ka da ki paidbah, ban khmih halor ki kam ri jingri, ban khmih ruh ia ki kam ba iadei bad ka ai bad sam ding ilektrik ha shnong, ban peit bha ruh ia ki jingroi ki karkhana bad kumjuh ruh ban khmih bha ia ki khlaw ki btap bad ka thungdieng thung siej ban iada ia ka mariang na ka jingjulor. Kine kiei kiei ki pynpaw ba ka Amendment ka la nang ai bor shuh shuh ym tang ia ki District Council hynrei ia ki shnong bad ki jaka sor ha ki bynta bapher bapher. Hynrei na ka bynta ka Meghalaya ki ban myntoi na kane ka Amendment kin long tang ki District Council hynrei ki shnong bad ki Municipal kin ym iohnong ei ei. Ka daw bah jong kane ka jingduhnong ka dei ka jingkhim mynsiem bad jyndong jingmut jong ki nongialam hapoh ka jylla bad ha ki shnong bapher bapher, ba ki kwah ban im ia ka juk rim sah juk rim bad sah kyllut ha ka jingsahdien randien. Kane baroh ka mih na ka jingbymiohi jngai, ka jingjyndong jingmut, ka jingtieng eit na ka bynta ki jingkylla ha kiei kiei kiba thymmai (cowardice for change).
Sa kawei pat ka bynta jong kaneka Amendment ka long ba yn don noh da ka State Finance Commission badn khmih halor ka jingwan ka peisa na ka Union Finance Commission bad kumno la pyniaid ia ka tyngka ba la ioh na ka sorkar India da ki Ditrict Council, ki dorbar shnong bad ki Municipal Council bad kumno ban lait na ka jingpynlut ksan ei khlem sngewthuh. Nagta, kan don sa kata ka State Election Commission ka ban peit bad khmih bniah bad pyniaid ia ki Ilekshon sha ki District Council, ki dorbar shnong bad ki Municipal Council. Nangta, kan don ka jingkhang ban kyntiap seng bad khang ia ki MDC ban long MLA ruh ha kajuh ka por.
|