La mad ia ka Congress, UDP, ailad sa ia ka KHNAM ha KHADC, ong u Bah Process

Shillong, 17 Rymphang:
U kyrtong MDC ka KHNAM na Mawlai u Bah Process T Sawkmie u la ong ba ki paidbah ki la dep ailad ia ka Congress, ia ka UDP ba kin synshar ha ka KHADC ha ki snem ba la dep, mynta ka dei sa ka pali ba kin ai lad ia ka KHNAM ba kan ialam ia ka Executive Committee (EC) ha KHADC.
Ka KHNAM ka pyn ieng 13 ngut ki kyrtong ha kane ka elekshon, ka la don ruh ka jingiasngewthuh jingmut ha ki katto katne ki jaka bad ka HSPDP, ha kaba ki khlem pynieng kyrtong.
Haba kren ha ka jingpynlait mat elekshon hynne ka sngi, u Bah Process u la ong ba ka party KHNAM ka long kum ka party AAP, kaba duk namar ba la kyrshan da ki briew lajong ban kyrshan dalade ialade.
“Ailad ia ka KHNAM ban ialam ia ka EC, phi la mad ia ka Congress, UDP, hynrei ym pat ju ai lad ia ka KHNAM”, la ong u Bah Process.
U la ong ba ka KHNAM ka kham mon ban iathaw EC para seng riewlum kiba don syriem ka rukom pyrkhat bad ka nongrim hynrei ka jingiapher ka long ba tang ka KHNAM kaba don ka mat ILP.