Shillong: U nongialam barim ka Congress u Bah Prestone Tynsong uba la iasoh bad ka NPP, u la ong ka jingmih noh u Bah DD Lapang na ka Congress ka don ka daw kaba bakla hadien ba u la don palat 40 snem.
Haba kren sha ki lad pathai khubor myn hynnin ka sngi, u la ong ba ha ka por ba u dang don mynshwa ha ka Congress, u la leit ban iakynduh ia ki nongialam ka AICC khamtam ia u Rahul Ganhdi bad ka Sonia Gandhi ba kin iapynbeit ia ka jingkynad hapdeng u Dr Mukul Sangma bad u Bah Pynshngain N Syiem, hynrei kim sngap.
“Ka jingmih u bah Lapang uba dei u nongialam ha kane ka dongmihngi bad ha India hadien 40 snem ba la don ha ka Congress, ka don ka daw kaba bakla pyrshah ia u”, la ong u Bah Prestone.
U la ong ba ka jingmih noh u Bah Lapang kan ktah shi katdei eh ia kane ka party.
U Bah Prestone u la ong ba, ma u lem bad kiwei ki MLA ka Congress ki la mih na ka Congress, dei namar bym shah shkor bad ka jingbym patiaw ki nongialam ka AICC.
“Ka AICC ka la phiel ban tehlakam ia ka party bad shwa ka elekshon MLA ba la dep, ngi la mih noh bun ki MLA”, u la ong.
Ha kawei ka liang, u Bah Prestone u la ong ba u wan iakynduh ia u Zoram Thanga u nongialam ka Mizo National Front (MNF) ban pynkhreh ia ka elekshon kaban long ha katei ka jylla shen.
“Ha kane ka jingialang, la iakren halor ka elekshon bad la kyrpad ia kiwei ki nongialam wat na ka Congress kiba don ha ka jylla Mizoram ban iasoh bad ka NPP namar ba ka ieng na ka bynta ban iada, ban peit bad ban kyntiew ia ka dongmihngi ka India”, la ong u Bah Prestone.
U la ong ba ka NPP ka la don ha Manipur, ha Assam, ha Nagaland, ha Meghalaya bad mynta sa ha Mizoram. Ka jingleit jongu sha Mizoram ka long ban pynkhlain ruh ia ka NPP ha katei ka jylla ban khang lad ia ka Congress ban wan ha ka bor.