Shillong, 11 Nohprah: Ia ka jingkyrkhu ia u maw nongrim jong ka jingtei ba thymmai na ka bynta ki tnat pule commerce, management bad kiwei kiwei ki jingpule jong ka St. Anthony’s College la pyllong hynnin ka sngi, ka 10 tarik u Nohprah, 2015 ha St. Anthony’s College ha kaba u joint secretary jong ka University Grants Commission (UGC), u ba naka office kaba ha Guwahati, u Dr. Mohammad Arif, u la long u Chief Guest.
Ia kane ka jingtei ba thymmai, ia kaba la mang ban pyndep hapoh ar snem, yn pynsah nam ia u Rev. Fr. Douglas J. Wollaston, SDB, u principal ba lai jong katei ka college.Lah ban pynkynmaw hangne ba ia ka St. Anthony’s College la seng ha u snem 1934 ha ka por ba dang synshar ka sorkar Phareng bad ha ka por ba bun jingeh bha ban sdang ia kum kane ka jait kam.
Ha ka por ba ka seng Salesian jong u Don Bosco ka la seng ia kane ka college ka jingthmu ka long “Ban pynpoi ia ka jingpule college sha kito ki bym don lad bad kiba dang duna ka jingioh.Wat lada ia ka St. Anthony’s College ha kine ki 80 snem tam ka la ai ka jingshakri kaba khraw ha ka liang ka pule ka dangle ym tang ia u paid Khasi-Pnar, hynrei ia kiba bun kiwei pat ha kane ka thain shatei-lam-mih’ngi ruh, ki 25 snem ba nyngkong jong kane ka College ki la dap tang da ki rai-eh rai-dam bad ki dieng pynkiang khamtam ha ki snem jong ka Thma Bah Ba-Ar. Ha ka jingkren jong u, kum u guest of honour, U provincial jong ka Silchar Province jong ki Salesian u Don Bosco, u Rev. Fr.George Maliekal, uba long ruh u President jong ka governing body jong ka St. Anthony’s College, u la dap tang da ki kyntien iaroh ia u Phadar Wollaston ia uba, u la ong, “Dei da ka kam phylla ba u la lah ban pyllait ia ka St. Anthony’s College na kaba khang duh noh ha kito ki snem ka ban jin da la long ka jingduh kaba khraw ia ki briew kane ka thain khamtam ia ki bym don lad don lynti.U Phadar Maliekal u la ong ba u Phadar Wollaston u la ju dei u samla pule uba stad bha bad uba la trei ruh ha bun ki shnong bad ki nongbah jong ka Ri India bad jong kane ka thain ba kynthup ia ka Bandel kaba ha West Bengal, Bombay, Haflong, Marbisu bad ha Sacred Heart Theological College ha Mawlai. U la ong ia u Phadar Wollaston la kha ha ka 11 tarik u Nohprah, 1902 ha Akyab kaba ha ka ri ia kaba la tip kum ka Ri Myanmar ba mynta. Naduh ba u dang samla u la pynpaw ba u long uba stad bha. Wat lada ki kmie ki kpa jong u ki la don da kawei ka jingthmu na ka bynta jong u bad nalor ba u ladon lypa ha ka jingtrei kaba bha bad kaba bun ka jingioh ka ban jin da la kyntiew shuh shuh ia u ha ka jingim, U Wollaston, ynda u la dap 21 snem ka ryta, u la ieh noh ia ka kam ba heh bad ba kor jingioh jong u bad jied ban leit long Lyngdoh Catholic noh ha ka seng riewniam Salesian jong u Don Bosco.Tang hapoh khyndiat snem, ong u Phadar George, ia u Wollaston la phah noh sha nongbah Turin ha Ri Italy ba un leit pule Theology. Hadien ba u la shah pynkyntang lyngdoh bad ba u la pyndep bad pass ia ka doctorate ha ka Theology, u la wan phai noh sha Ri India ban trei, ym tang kum u principal jong ka St. Anthony’s College hynrei ha kiwei de ki kam kiba ki bahalor jong u ki la buh ia u ban trei kum ha Bombay, Krishnagar, Khulna, Bandel, Hungdung, Imphal, Marbisu, Tura bad Haflong.Ia ki snem ba khatduh jong ka jingim jong u, u la pyllut ha Sacred Heart College Mawlai. Wat haka jingpang ba jur jong u, u Phadar Wollaston u dap beit tang da ka mynsiem jingphuh sam rkhie. La ju iohsngew ba u biria kai da kaba ong: “Ever better, never well.”U Phadar Wollaston u la khlad noh na kane ka pyrthei ha ka 17 tarik u Kyllalyngkot, 1979 bad la tep ia u ha u lum jingtep Catholic Laitumkhrah.
Ha ka jingkren jong u kum u Chief Guest u joint secretary ka UGC Guwahati office, u Dr. Mohammad Arif, u la ban jur ia ka jingkongsan jong ka pule ka puthi ia kaba u la pyniasyriem kum u shabi na ka bynta ka roi ka par jong ka ri.U la iaroh shibun ia ka St. Anthony’s College na ka bynta ki kam ba radbah jong ka ha ka liang ka pule ka puthi kiba la iarap shibun ia ki samla ban don bynta ha ka roi ka par jong ka ri.
“Da kine ki kam ba radbah jong ka ha ka liang ka pule ka puthi da kiba ki samla ki lah ioh jingnang jingtip ha ka liang ki sap trei kam kiba bun, ka St. Anthony’s College ka la pynnoh ia synniang u bynhei u ba bunbah na ka bynta ka roi ka par jong ka ri,” u la ong.Ryngkat bad ka jingiaroh ia ka college kaba la don ha khmat eh ha ka liang ki jinghikai ia ki samla ban ioh ia ki sap ki phong ba donkam ban pynim ia ki, u Dr. Arif u la ong, “Ka long kaba dei eh ba ia kane ka jingtei ba thymmai yn pynsah nam ha u Phadar Wollaston uba la long u nongiohi jngai bad uba la trei radbah ruh na ka bynta ia ka jingkyntiew ka St. Anthony’s College.U principal jong ka college u Rev. Bro. Albert L Dkhar u la long u wei na kiba la ai jingkren ha kane ka sngi.La pynphuh pynphieng ruh ia kane ka sngi da ki sap jingrwai bad jingshad tynrai ba la ai da ki samla pule jong kane ka college.
Phi don ban ong eiei?