La jan poi ka por khang dam ia ki dukan kyiad, khalai ha Iewduh

Shillong:U Chief Excutive Member jong ka Khasi Hills Autonomous District Council u bah Titostarwell Chyne, u la iathuh ba na ka bynta ban khang lad ia ki kam beain, kiba don ha ki iew; ka District council kan wanrah ia ka jingpynkylla ia ka ain Khasi Hills District Establishment Management Control of Market.

Haba ia kren bad ki lad pathai khubor,ha ka sngi balang, u bah Chyne u la iathuh ba ia kane ka jing pynkylla ia kane ka KHDEMCM, yn wan rah ha ka budget session ka ban long ha ka 26 tarik mynta u bnai. U la iathuh ba ka jingpynkylla bad pyn rung ia ki katto katne ki kyndon ha kaba kane ka ain kan iarap ia ki nongrep kiba ju ia kynduh ia ki jingeh man ka por ha ki iew. U la iathuh ruh ba ka jingpynkylla ia kane ka ain kan long ruh kum shibynta ban pynkhlain ia ki iew ki ba ym pat lah ban ioh ka jing ithuh na ka District Council bad u ong ruh ki ain ki ban weng noh ia ki kam beain kiba don ha ki iew kynthup ia ka jingpyniaid ia ki dukan ia khalai bad ki dukan die kyiad.

U CEM u la iathuh ruh ba lada ka pdiang ia kane ka ain ha ka Budget session ha ingdorbar, jong ka KHADC ki dukan kyiad beain ki resturant kyiad ha iewduh bad ki dukan khalai kin hap ban khang noh mardor.
U la ong ruh ba ha ka ba iadei bad ki Wine store ki ba don ha iewduh kine ki dukan yn ym lah ban weng hynrei kine ki dukan kin hap pan jingbit na ka KHADC. La iathuh ruh ba ha ka jingialang la shim ruh ia ka rai ban phah biang ia ka Khasi Hill Autonomous District solid waste Manangement Bill sha ka District Council Affair.

U bah Chyne u la iathuh ba ia kane ka Bill la dep ban pdiang da ka ing dorbar jong ka KHADC ha u snem ba la dep, hynrei na ka liang ka DCA, ka la pynphai ban phah pynbeit bad mynta hadien ba la dep ban pynbeit ka KHADC kan sa phah biang ia kane ka Bill.