La jan kut U Naiwieng, ym pat ioh khaw tad dor ki duk

Shillong, 19 Naiwieng:
Ka jingthmu jong ka sorkar Congress, ban pyntreikam ia ka skhim sam khaw baduk, ha ka Jylla, kaba dei ban sdang naduh mynta u bnai, kam pat shym la iohi dak eiei ruh em haduh ha kine ki sngi bad ka daw jong katei ka jingslem, la sngewthuh ba katei ka tnat sam khaw, haduh mynta, kam don ia ki jingkhein kiba biang, ia ka jingdon ki khlieh briew ha kylleng ka Jylla, kiba dei ban ioh ia utei u khaw tad dor.
Katkum ka jingiathuh u Joint Director ka Food & Civil Supplies u Bah PM Syiem u la ong ba ka jingsam khaw tad sha ki paibah kan dang shim por hi katto katne por, namar ba ka tnat sam bam haduh mynta, kam pat ioh ia ka Khanasamari jong ka ioh ka kot ba la leh da ka C&RD bad ka Municipal.
“Ka jingsam khaw tad kam pat lah ban treikam mynta bad ka dang shimpor ban sam namar ba kim pat ioh ia ka khana samari jong ka ioh ka kot”, la ong u Bah PM Syiem.
Ha kajuh ka por u Bah PM Syiem u la iathuh ba hadien ba la ioh ia ka khana samari, ka shong pat ha u DC bad u SDO ba kin jied ia ki briew ki ban ioh jingmyntoi na u khaw tad bad na ka liang ka tnad Supply kan shu pynbiang ia kiba donkam.
Kumba 21 lak ngut ki nongshong shnong ka jylla kin ioh ia u Khaw tad dor jong ka sorkar ba shongdor tang T.3 shi kilo bad yn sam san kilo shi khlieh briew ha ka shi bnai, bad ia kane yn sam lyngba ki dukan sam reshon.
Ha nongkyndong ka sorkar ka la mang kumba 75 percent ki paidbah nongshong shnong ki ban ioh ia u khaw tad bad 50 percent la mang na bynta ki paidbah ha sor.Ki paidbah kin ban ioh jingmyntoi na u khaw tad yn sa sam ha ki ia card reshon.
Ka sorkar pdeng ka sam khaw tad lyngba ka Food Security Bill hadien ba ka sorkar ka la pas ia ka Ordinance Bill ban sam ia u khaw tad dor.